«Тошшаҳартрансхизмат» компанияси 2018—2019 йилларда сиқилган газда ҳаракатланувчи 550 та паст полли SamAuto LЕ 60 ва MAN автобусларини сотиб олади. Бу ҳақда компания раиси Моҳирхўжа Валиев матбуот анжуманида айтиб ўтди, деб ёзади «Газета.uz».
Улар кондиционер ва пандус (ногиронлиги бўлган кишиларнинг чиқиб-тушишлари учун мўлжалланган йўлаклар) билан жиҳозланади. 160 та машинадан иборат биринчи партия ноябрда, яна 200 таси 2019 йилда келиб тушиши режалаштирилган.
Таъкидланишича, БМТ Тараққиёт дастури доирасида мамлакатга электробусларни келтириш юзасидан лойиҳага қўл урилган.
«Биз 10—15 та электробусларни ишга туширишни кўзда тутувчи лойиҳа устида ишлаяпмиз. Улар жорий автобусларнинг ўрнини босмайди, балки алоҳида йўналишларда қатнайди. Ушбу экологик транспорт учун инфратузилма керак. Лойиҳани амалга ошириш гуруҳини тузиб, бир йил-бир ярим йил ичида бу йўналиш билан шуғулланиш режалаштирилмоқда. Лойиҳа қисман БМТ ТД томонидан молиялаштирилади», — деди Моҳирхўжа Валиев.
Бундан ташқари, унинг қайд этишича, Халқ таълими вазирлиги билан ҳамкорликда мактаб автобуслари лойиҳаси ишлаб чиқилмоқда.
Изоҳ (0)