Ўзбекистон ёшлар иттифоқи ташаббуси билан Мустақилликнинг 27 йиллигига бағишлаб «Ўзбекистон ёшлар иттифоқидан 27 туҳфа» сифатида «Ёшлар кутубхонаси» доирасида бадиий китоблар чоп этилди. Бу ҳақда «Дарё»га Ёшлар медиа маркази маълум қилди.
«Ёшлар кутубхонаси» лойиҳаси 2017 йилда Ўзбекистон ёшлар иттифоқи Марказий Кенгаши томонидан ёшлар ўртасида китоб мутолааси ва китобхонлик маданиятини ошириш, таълим муассасаларининг бадиий китобларга бўлган эҳтиёжини қондиришда кўмаклашиш мақсадида ташкил этилганди.
Жорий йилда Ўзбекистон ёшлар иттифоқи Марказий Кенгаши томонидан лойиҳа учун 10 миллиард сўм маблағ ажратилган. Лойиҳа доирасида ҳар бир китоб камида 10 минг нусхада чоп этилиб, республикадаги барча мактаб, коллеж, академик лицей ва олий таълим муассасалари кутубхоналарига бепул тарқатилади. 2018 йил охирига қадар ҳар бир таълим муассасаси кутубхонасига 100 номдаги бадиий китоб етказиб берилиши режалаштирилган.
Лойиҳа доирасида 2018—2019 йилларда чоп этиладиган 200 номдаги китоб рўйхати Ўзбекистон ёзувчилар уюшмаси, Матбуот ва ахборот агентлиги, Халқ таълими вазирлиги ҳамда Олий ва ўрта махсус таълим вазирликлари тавсияси асосида шакллантирилган. Жумладан, жаҳон адабиётига оид 65, ўзбек адабиётида доир 135 та нодир асар чоп этилиши режалаштирилган.
Уларнинг 45 фоизи 20 ёшдан катталар учун, 25 фоизи 7-14 ёшдаги болалар учун ҳамда 30 фоизи 15-20 ёшдаги ўсмирлар учун чоп этилади. Бадиий асарларнинг 50 фоизи замонавий адабиёт, 15 фоизи классик адабиёт, 35 фоизи эса ХХ аср адабиётини эса ташкил этади.
Изоҳ (0)