Сурхондарё вилояти, Сариосиё тумани, «Ўзбекистон» маҳалласида яшовчи Ойбек Жўраевнинг Навоий шаҳрига «гастрол»идаги фирибгарлик номери ўтмади. Бу ҳақда «Халқ сўзи» хабар бермоқда.
Ойбек Навоий шаҳридаги «Навоий шарқ нури» МЧЖ раҳбарига ўзини «Навоий азот» АЖ вакили сифатида таништириб, ишончига киради. Масъулияти чекланган жамиятга қарашли Artel савдо дўконидан 3 дона телевизор ва 2 дона совутгич, жами қиймати 10 миллион 845 минг сўмлик товарни сотиб олиш истагини билдириб, пулларни «Навоий азот» АЖдан олиб беришини баён этади.
МЧЖ раҳбари укасига товарларни манзилга элтиб қўйиш ва бир йўла пулни олиб қайтиш топшириғини беради.
Ойбек йўл-йўлакай уканинг ҳам ишончига кириб, буюмларни Кармана туманидаги савдо дўконларидан бирининг ёнига тушириб, «Навоий азот»га йўл олади. Кетаверишда эса 10-кичик тумандаги деҳқон бозори ҳудудида уни адаштириб, фирибгарлик йўли билан буюмларни қўлга киритади.
Ички ишлар идораси ходимлари олиб борган тезкор тадбирлар натижасида фирибгар қўлга олиниб, мазкур ҳолат юзасидан О. Жўраевга нисбатан Жиноят кодексининг 168-моддаси 1-қисми билан жиноят иши қўзғатилди. Унинг шунга ўхшаш бошқа жиноятларга дахлдорлиги суриштирилмоқда.
Изоҳ (0)