Surxondaryo viloyati, Sariosiyo tumani, “O‘zbekiston” mahallasida yashovchi Oybek Jo‘rayevning Navoiy shahriga “gastrol”idagi firibgarlik nomeri o‘tmadi. Bu haqda “Xalq so‘zi” xabar bermoqda.
Oybek Navoiy shahridagi “Navoiy sharq nuri” MChJ rahbariga o‘zini “Navoiy azot” AJ vakili sifatida tanishtirib, ishonchiga kiradi. Mas’uliyati cheklangan jamiyatga qarashli Artel savdo do‘konidan 3 dona televizor va 2 dona sovutgich, jami qiymati 10 million 845 ming so‘mlik tovarni sotib olish istagini bildirib, pullarni “Navoiy azot” AJdan olib berishini bayon etadi.
MChJ rahbari ukasiga tovarlarni manzilga eltib qo‘yish va bir yo‘la pulni olib qaytish topshirig‘ini beradi.
Oybek yo‘l-yo‘lakay ukaning ham ishonchiga kirib, buyumlarni Karmana tumanidagi savdo do‘konlaridan birining yoniga tushirib, “Navoiy azot”ga yo‘l oladi. Ketaverishda esa 10-kichik tumandagi dehqon bozori hududida uni adashtirib, firibgarlik yo‘li bilan buyumlarni qo‘lga kiritadi.
Ichki ishlar idorasi xodimlari olib borgan tezkor tadbirlar natijasida firibgar qo‘lga olinib, mazkur holat yuzasidan O. Jo‘rayevga nisbatan Jinoyat kodeksining 168-moddasi 1-qismi bilan jinoyat ishi qo‘zg‘atildi. Uning shunga o‘xshash boshqa jinoyatlarga daxldorligi surishtirilmoqda.
Izoh (0)