2018 йилнинг ўтган даври мобайнида Каттақўрғон туманида 16 нафар ижтимоий ҳимояга мухтож ногирон фуқароларга имтиёзли кредит асосида уй-жой сотиб олиш учун бошланғич тўловлари тўлаб берилди. 70 нафар фуқарога маиший техникалар ва газ баллонлари тақдим этилди. Бу ҳақида Каттақўрғон туманида ташкил этилган пресс-турда туман ҳокими Аъзамхон Баҳрамов маълумот бериб ўтди, деб хабар берди «Дарё» мухбири Фарҳод Норбўтаев.
Туман ҳокимлиги томонидан 25 нафар фуқаронинг уй-жойлари таъмирланиши учун моддий ёрдам кўрсатилган. Шунингдек, 6 нафар фуқарога мураккаб тиббий амалиёт кўрсатилиши учун ҳомийлик ёрдамлари ташкил этилган.
Аҳолининг, хусусан, ўз яшаш шароитини яхшилашга муҳтож оилалар учун 2018 йилда умумий қиймати 37,6 миллиард сўм бўлган 8 та икки қаватли 128 хонадонга мўлжалланган арзон уй-жойларини қурилиш ишлари сўнгги босқичга етказилган.
Туманда қурилиш-ободонлаштириш ишларига 6,6 миллиард сўм маблағ ажратилиб, 30 километр масофадаги ички йўллар қайта таъмирланди. 17 та кўп қаватли турар жойларнинг инфраструктураси яхшиланди. 22 километр масофадаги сув қувирлари ва иншоотлари реконструкция қилинди.
Шунингдек, аҳолини маданий ҳордиқ олиши учун туман марказий истироҳат боғи капитал таъмирланиб, 2 та нурли мусиқали фаввора фойдаланишга топширилди. Туман марказидаги 70 сотих ер майдонида янги боғ ташкил этилди.
Изоҳ (0)