2018-yilning o‘tgan davri mobaynida Kattaqo‘rg‘on tumanida 16 nafar ijtimoiy himoyaga muxtoj nogiron fuqarolarga imtiyozli kredit asosida uy-joy sotib olish uchun boshlang‘ich to‘lovlari to‘lab berildi. 70 nafar fuqaroga maishiy texnikalar va gaz ballonlari taqdim etildi. Bu haqida Kattaqo‘rg‘on tumanida tashkil etilgan press-turda tuman hokimi A’zamxon Bahramov ma’lumot berib o‘tdi, deb xabar berdi “Daryo” muxbiri Farhod Norbo‘tayev.
Tuman hokimligi tomonidan 25 nafar fuqaroning uy-joylari ta’mirlanishi uchun moddiy yordam ko‘rsatilgan. Shuningdek, 6 nafar fuqaroga murakkab tibbiy amaliyot ko‘rsatilishi uchun homiylik yordamlari tashkil etilgan.
Aholining, xususan, o‘z yashash sharoitini yaxshilashga muhtoj oilalar uchun 2018-yilda umumiy qiymati 37,6 milliard so‘m bo‘lgan 8 ta ikki qavatli 128 xonadonga mo‘ljallangan arzon uy-joylarini qurilish ishlari so‘nggi bosqichga yetkazilgan.
Tumanda qurilish-obodonlashtirish ishlariga 6,6 milliard so‘m mablag‘ ajratilib, 30 kilometr masofadagi ichki yo‘llar qayta ta’mirlandi. 17 ta ko‘p qavatli turar joylarning infrastrukturasi yaxshilandi. 22 kilometr masofadagi suv quvirlari va inshootlari rekonstruksiya qilindi.
Shuningdek, aholini madaniy hordiq olishi uchun tuman markaziy istirohat bog‘i kapital ta’mirlanib, 2 ta nurli musiqali favvora foydalanishga topshirildi. Tuman markazidagi 70 sotix yer maydonida yangi bog‘ tashkil etildi.
Izoh (0)