Ўзбекистонлик таниқли журналист Борис Бабаев 70 йиллар охирида Тошкентда Иосиф Кобзондан катта интервью олгани ҳақида гапириб берди, деб ёзади Sputnik.
Унинг сўзларига кўра, Кобзон 70 йиллар охири — 80 йиллар бошида Ўзбекистонга тез-тез ташриф буюрган. Айнан Тошкентдан у 9 марта уруш қўйнидаги Афғонистонда концертлар бериш учун учиб кетган.
Тошкентдаги офицерлар уйида бўлиб ўтган концертидан кейин, Кобзон Борис Бабаевга интервью берган.
«Мен шунчалик кучли одамни кўрдим, у ўзига ишонган одам эди. Биз ўшанда у билан жуда яхши суҳбат қурдик. Иосиф Кобзон болалигини, оиласи Ўзбекистонга эвакуация қилинган даврларни, Янгийўлдаги ёғ заводи яқинига келиб қолганларини эсга олди», — деди журналист.
Ўшанда Кобзон ўзбек халқи шарофати билан уларнинг оиласи омон қолганлигини алоҳида таъкидлаган. Уй эгалари улар билан сўнгги бўлак нонини бўлишиб еган.
Ўзбекистондаги ҳаёти ҳақидаги хотиралари билан Иосиф Кобзон Борис Бабаев сценарийси асосидаги «Тошкентнинг катта юраги» фильмида ҳам бўлишган.
Уруш тугагач, Иосиф Кобзоннинг оиласи Украинага қайтиб кетган. Кобзон машҳур бўлиб кетганидан кейин, у фахрийларни табриклаш учун Тошкентга хайрия концертлари билан кўп келган. У Ўзбекистонга келишни яхши кўрарди, бу ерга унинг бувиси дафн қилинган.
Изоҳ (0)