25 август куни Ўзбекистон халқ шоири Зокиржон Ҳолмуҳаммад ўғли Ҳабибий туғилиб ўсган Андижон вилоятининг Пахтаобод тумани марказидаги сўлим боғ марҳум шоирнинг яқинлари, шогирдлари ва мухлислари билан гавжум бўлди, деб хабар беради маданият вазирлиги матбуот хизмати.
Бунга мазкур боғда жойлашган ва қайта таъмирланиб, янгидан ташкил этилган Андижон вилоят тарихи ва маданияти давлат музейи Зокиржон Ҳабибий ёдгорлик филиали янги экспозициясининг расмий очилишига бағишланган адабий-мусиқий тадбир сабаб бўлди
Даставвал сўзни Пахтаобод тумани ҳокими ўринбосари олиб, йиғилган меҳмонларга туман ҳокимининг табригини ўқиб эшиттирди.
Шундан сўнг, Пахтаобод туман маданий маркази созанда ва хонандаларидан иборат мусиқий гуруҳ Ҳабибий ғазаллари билан айтилувчи қўшиқ ижро этди.
Тадбирда Андижон вилоят Ёзувчилар уюшмаси раиси шоира Ҳуршидабону Қўчқорова, шоирнинг дўсти Алишер Қосимов ҳамда Санъатбек Иноқовлар Ҳабибий ҳақидаги хотираларини сўзлаб берди.
Тадбир давомида куй-қўшиқ ва рақслар ижро этилиб турди, Ҳабибий издошлари бўлган ёш шоиралар шоир ғазалларидан ва ўз ижод наъмуналаридан ўқиб эшиттирди. Шундан сўнг меҳнат фахрийси Ферузахон Ҳалилова ҳамда Ҳабибийнинг катта қизи Фаридахон Холматовалар тасма қирқиб музейни расмий очиб берди.
Изоҳ (0)