Индонезиянинг Жакарта ҳамда Палембанг шаҳарларида давом этаётган XVIII ёзги Осиё ўйинлари ўзининг энг қизғин палласига кириб бормоқда. Яна 2 кундан сўнг мусобақалар якунига етади.
XVIII Осиё ўйинларига 331 нафар спортчи билан келган Ўзбекистон делегацияси ҳисобида ҳозирча 49 та медаль мавжуд. Шулардан 13 таси олтин, 18 таси кумуш, 18 таси эса бронза медаллари. Умумий рейтингда эса делегация 7-ўринни эгаллаб турибди.
Ўзбекистон шу вақтга қадар 6 та Осиё ўйинларида қатнашган. Медаль жамғариш бўйича Гуангжоу—2010 мусобақаси ўзбекистонлик спортчилар учун омадли келган—жами 56 та медаль. Олтин медаль борасида Пусан—2002 мусобақаси пешқадам. Ўшанда ўзбекистонлик спортчилар ўз ҳисобларига 15 та олтин медални ёзиб қўйишган.
Олдинда ўзбекистонлик 7 нафар боксчининг ярим финал жангларида иштирок этиши ҳисобга олинадиган бўлса, катта эҳтимол билан олтин жамғариш борасидаги кўрсаткич ҳам медаль жамғариш борасидаги кўрсаткич ҳам янгиланиши мумкин.
Фақатгина умумжамоа ҳисобида 5-ўринни эгаллаш борасида бундай фикр билдириб бўлмайди. Сабаби Эрон ҳисобида ҳозирнинг ўзида 19 та олтин медали мавжуд. Бу эса табиийки кўпайиши мумкин. Қуйида Ўзбекистон термасининг 6 та Осиё ўйинларидаги иштироки билан танишишингиз мумкин:
- Ҳиросима—1994: 11 та олтин, 12 та кумуш, 19 та бронза. Жами 42 та медаль. Умумжамоа ҳисобида 5-ўрин.
- Бангкок—1998: 6 та олтин, 22 та кумуш, 12 та бронза. Жами 40 та медаль. Умумжамоа ҳисобида 10-ўрин.
- Пусан—2002: 15 та олтин, 12 та кумуш, 24 та бронза. Жами 51 та медаль. Умумжамоа ҳисобида 5-ўрин.
- Доҳа—2006: 11 та олтин, 14 та кумуш, 15 та бронза. Жами 40 та медаль. Умумжамоа ҳисобида 7-ўрин.
- Гуангжоу—2010: 11 та олтин, 22 та кумуш, 23 та бронза. Жами 56 та медаль. Умумжамоа ҳисобида 8-ўрин.
- Инчеон—2014: 9 та олтин, 14 та кумуш, 22 та бронза. Жами 45 та медаль. Умумжамоа ҳисобида 11-ўрин.
- Жакарта-Палембанг—2018: 13 та олтин, 18 та кумуш, 18 та бронза. Жами 49 та медаль. Умумжамоа ҳисобида ҳозирча 7-ўрин...
Изоҳ (0)