Тошкент прокуратураси «Миллий» стадиони (собиқ «Бунёдкор») ва Ўзбекистон футбол ассоциацияси ўртасидаги можарони ҳал этишда ҳуқуқий кўмак кўрсатади. Бу ҳақда мамлакат бош прокуратураси маълум қилди, деб ёзади «Газета.uz».
Август ойининг иккинчи ярмида пойтахт прокуратураси «Миллий» стадиони фаолияти юзасидан текширув ўтказди ва бир қатор муаммоларни аниқлади.
Жумладан, 2012 йилда фойдаланишга топширилган стадионнинг кадастр ҳужжатлари бугунги кунга қадар расмийлаштирилмаган. Стадионда «Трест 12» ташкилоти томонидан бажарилган ишлар буюртмачи томонидан 2016 йилда қабул қилинган бўлса, «Зеромакс» компанияси (фаолияти тўхтатилган) томонидан бажарилган қурилиш ишлари қабул қилинмаган.
Стадионнинг ички ўт ўчириш сув қувури ўчирилганлиги, бу эса ёнғин юзага келган тақдирда стадион ходимлари ва томошабинлари ҳаётига таҳдид солиши аниқланди. Металл сув қувурларида тешиклар пайдо бўлган.
Шунингдек, Бош прокуратуранинг таъкидлашича, стадион имкониятларидан тўлиқ фойдаланилмаган: «Биргина «Ўзтрансгаз» компанияси ҳомийлик қилганлиги сабабли вақти-вақти билан молиявий муаммолар кузатилган. Жумладан, стадион ходимлари июль ойида маош олмаган, газон учун ўғитлар, махсус транспорт учун махсус комплект қисмлар ва ёқилғи харид қилинмаган, бинони капитал таъмирлаш ва газонни тўлиқ алмаштириш зарурати юзага келган».
Муаммоларни ҳал этиш учун Тошкент прокуратураси стадион маъмуриятига ташкилий-ҳуқуқий кўмак кўрсатади. Мазкур масалаларни ҳал этиш Ўзбекистон Бош прокуратураси назоратида.
Изоҳ (0)