Toshkent prokuraturasi “Milliy” stadioni (sobiq “Bunyodkor”) va O‘zbekiston futbol assotsiatsiyasi o‘rtasidagi mojaroni hal etishda huquqiy ko‘mak ko‘rsatadi. Bu haqda mamlakat bosh prokuraturasi ma’lum qildi, deb yozadi “Gazeta.uz”.
Avgust oyining ikkinchi yarmida poytaxt prokuraturasi “Milliy” stadioni faoliyati yuzasidan tekshiruv o‘tkazdi va bir qator muammolarni aniqladi.
Jumladan, 2012-yilda foydalanishga topshirilgan stadionning kadastr hujjatlari bugungi kunga qadar rasmiylashtirilmagan. Stadionda “Trest 12” tashkiloti tomonidan bajarilgan ishlar buyurtmachi tomonidan 2016-yilda qabul qilingan bo‘lsa, “Zeromaks” kompaniyasi (faoliyati to‘xtatilgan) tomonidan bajarilgan qurilish ishlari qabul qilinmagan.
Stadionning ichki o‘t o‘chirish suv quvuri o‘chirilganligi, bu esa yong‘in yuzaga kelgan taqdirda stadion xodimlari va tomoshabinlari hayotiga tahdid solishi aniqlandi. Metall suv quvurlarida teshiklar paydo bo‘lgan.
Shuningdek, Bosh prokuraturaning ta’kidlashicha, stadion imkoniyatlaridan to‘liq foydalanilmagan: “Birgina “O‘ztransgaz” kompaniyasi homiylik qilganligi sababli vaqti-vaqti bilan moliyaviy muammolar kuzatilgan. Jumladan, stadion xodimlari iyul oyida maosh olmagan, gazon uchun o‘g‘itlar, maxsus transport uchun maxsus komplekt qismlar va yoqilg‘i xarid qilinmagan, binoni kapital ta’mirlash va gazonni to‘liq almashtirish zarurati yuzaga kelgan”.
Muammolarni hal etish uchun Toshkent prokuraturasi stadion ma’muriyatiga tashkiliy-huquqiy ko‘mak ko‘rsatadi. Mazkur masalalarni hal etish O‘zbekiston Bosh prokuraturasi nazoratida.
Izoh (0)