Лозанна маъмурияти Шимолий Африкадан келган оилавий жуфтликка Швейцария фуқаролигини беришдан бош тортди. Meduza’нинг ёзишича, улар натурализация бўйича комиссия суҳбатида бошқа жинс вакилларининг саволларига жавоб бермаган ва қўл узатмаган.
BBC News’нинг ёзишича, суҳбат вақти эр-хотинниг диний эътиқоди масаласи муҳокама қилинмаган, бироқ, BBC News’нинг алоҳида қайд этишича, уларнинг мусулмон эканини англаш қийин эмасди.
Шаҳар маъмуриятининг маълум қилишича, «жуфтлик қарама-қарши жинс вакилларининг саволларига жавоб беришдан бош тортиш орқали таҳқирловчи феъл-атвор намойиш этган». «Бундай ёндашув эса конституциямизнинг асос тамойилларига ва жамиятимиз асосларига, айнан — эркаклар ва аёллар тенглиги тамойилига ҳурматсизликдир», — дейилади шаҳар маъмурияти баёнотида.
2016 йили Швейцариядаги бир мактаб мусулмон оиладан чиққан икки ўсмирга — улар оиласига мансуб бўлмаган аёлларга тегиниши мумкин бўлмагани боис — аёл ўқитувчиларга қўл бериб кўришмасликка рухсат берган эди. Оқибатда кейинчалик бу оиланинг Швейцария фуқаролигини олиши жараёни тўхтатиб қўйилган.
2018 йили эса Францияда Жазоирдан келган бир аёлга фуқаролик берилмаган эди — бунга у тантанали маросимда бегона бир эркак билан қўл бериб кўришишдан бош тортгани сабаб бўлган эди.
Изоҳ (0)