«Ўзэлтехсаноат»: Самарқанддаги «Сино» заводи банкрот эмас, балки кузатувда

«Ўзэлтехсаноат» АК ахборот хизмати Самарқанддаги «Сино» заводининг банкрот деб эълон қилинганлиги тўғрисидаги хабарларга изоҳ берди.

Самарқанд шаҳар иқтисодий суди томонидан 2018 йил 7 августда «Сино» АЖнинг аризасини қабул қилиш, банкротлик ишини қўзғатиш ҳамда корхонада кузатув жараёнини жорий этиш тўғрисида ажрим қабул қилинган. Бироқ банкротлик иши қўзғатиш бу банкрот деб эълон қилиш дегани эмас.

Хусусан, «Банкротлик тўғрисида»ги қонуннинг 28-моддасига асосан қарздор юридик шахснинг банкротлиги тўғрисидаги иш кўрилаётганда қуйидаги таомиллар қўлланилади: кузатув, суд санацияси, келишув битими, ташқи бошқарув, тугатишга доир иш юритиш.

Ушбу қонуннинг 75-моддаси талабларига кўра «Сино» АЖда жорий этилган кузатув жараёни тугатилгандан сўнг иқтисодий суд қарздорни банкрот деб топиш ва тугатишга доир иш юритишни бошлаш тўғрисида қарор қабул қилиши ёки суд санациясини ёхуд ташқи бошқарувни жорий этиш ҳақида ажрим чиқаради ёки келишув битимини тасдиқлайди ва банкротлик тўғрисидаги иш юритишни тугатиши мумкин.

Мазкур қонун доирасида қарздорни банкрот деб эълон қилишдан олдин унинг мулкий ва иқтисодий аҳволини яхшилаш ҳамда келгусида барқарор ишлаб кетиши учун суд санацияси, келишув битими ва ташқи бошқарув таомиллари мавжуд бўлиб, улардан қайси бирини «Сино» АЖга нисбатан қўллаш фақатгина суд ва кредиторлар томонидан ҳал қилинади.

Шунингдек, қонуннинг 51-моддасига кўра фақтгина суд санациясини, ташқи бошқарувни жорий этиш, келишув битимини тасдиқлаш ёки банкротлик тўғрисидаги иш юритишни тугатиш учун асослар бўлмаган тақдирда, иқтисодий суднинг қарздор юридик шахсни банкрот деб топиш ҳамда тугатишга доир иш юритишни бошлаш тўғрисидаги қарори қабул қилинади.

Демак, «Сино» АЖда эндигина кузатув таомили жорий этилганлигини инобатга олиб, ушбу корхона банкрот деб эълон қилинди, дейишга асослар мавжуд эмас.