Инновацион ривожланиш вазирлиги томонидан Президентнинг «Ўзбекистон Республикасининг чўл ҳудудларини ривожлантиришга доир қўшимча чора-тадбирлар тўғрисида»ги фармони лойиҳаси ишлаб чиқилди. Унинг иловасида «Яшил чўл лабораторияси» концепцияси келтирилган. Бу ҳақда «Дарё»га вазирлик матбуот хизмати маълум қилди.
Фармон лойиҳаси Қоракўлчилик ва чўл экологияси илмий-тадқиқот институти ва Фанлар Академиясининг Ботаника институти томонидан ўрганиб чиқилди ва республиканинг чўл ҳудудларида «Яшил чўл лабораторияси»ни ташкил этиш тўғрисидаги инновацион таклифлар қўллаб-қувватланди.
Мазкур лойиҳа бўйича биринчи навбатда Навоий вилоятининг Нурота туманидаги чўл ҳудудида замонавий инновацион чўл лабораториясини ташкил қилиш кўзда тутилмоқда. Ҳудудларни босқичма-босқич чўл ўсимликлари дунёси билан бойитиб бориш, иссиқ иқлим шароитига мослаша оладиган ўсимлик турларини кўпайтириш лойиҳанинг асосий мақсадларидан биридир. Шунингдек, ҳудудда ҳайвонот дунёсини ортга қайтариш, қоракўлчилик учун озуқа базасини яратиш, био хилма-хилликни ошириш вазифаси ҳам қўйилган.
Бундан ташқари, экин ерларни қўриқлаш чораларини кўриш, чўлланиш ҳолатларини юмшатиш, экотуризм ва агротуризмни ривожлантириш ҳам лойиҳа доирасидаги муҳим масалалардан.
Лойиҳа амалга тушгач, чўл ҳудудларидан унумли фойдаланиш натижасида республикада ўсимликлар қоплами кенгайиши ва чўлланиш ҳолатлари камайиши кутилмоқда. Шунингдек, илмий-тадқиқот институтлари ва тажриба лабораторияси ўртасида амалий ҳамкорлик ташкил қилинади. Кенг майдонларни кўкаламзорлаштириш ва қоракўлчилик учун озуқа базасини яратиш чоралари кўрилади. Экотуризм ва агротуризмни ривожлантириш устида иш олиб борилади.
Изоҳ (0)