Туркия президенти Ражаб Тоййиб Эрдўғон АҚШда ишлаб чиқарилган электроника маҳсулотларини бойкот қилиш режалари ҳақида эълон қилди, деб ёзади Meduza.
«Биз Америка электроникасига бойкот эълон қиламиз. Уларда айфон бўлса, бошқа томонда Samsung бор. Бизда ҳам ўз смартфонимиз Vestel Venus бор», — деди Туркия президенти.
Чекловчи чоралар қачон жорий қилиниши ва улар айнан қандай турдаги маҳсулотларга тааллуқли бўлиши ҳақида Эрдўғон ҳозирча ҳеч нарса айтгани йўқ.
Эслатиб ўтамиз, август бошида АҚШ Молия вазирлиги икки турк вазири — ИИВ раҳбари Сулейман Сўйлу ва Адлия вазирлиги раҳбари Абдулҳамит Гюлга қарши санкциялар жорий этди. Бунга уларнинг америкалик пастор Эндрю Брансонни таъқиб этишдаги роли сабаб бўлди.
Туркияда 20 йилдан ортиқ истиқомат қилган пастор Эндрю Брансон муваффақиятсиз давлат тўнтаришидан бир неча ой ўтиб, 2016 йилда Измирда қўлга олинган эди. Брансон Курдистон ишчи партияси ва Фатҳуллоҳ Гулен тарафдорлари билан алоқаларда айбланди.
Кейинроқ Дональд Трамп Туркиядан келтириладиган алюминий ва пўлат учун божларни икки карра оширишга қарор қилди. Бунинг оқибатида август ўрталарида турк лираси кескин қадрсизланди. Унинг долларга нисбатан курси йил бошидан буён 40 фоизга пастлади.
Изоҳ (0)