«Тараққиёт стратегияси» марказида Халқаро пресс-клуб билан ҳамкорликда Deutsche Welle академияси вакиллари иштирокида «Замонавий журналистика учун кадрлар тайёрлаш: Deutsche Welle академияси тажрибаси« мавзуида давра суҳбати бўлиб ўтди. Бу ҳақда марказ матбуот хизмати маълум қилди.
Тадбирда Халқаро пресс-клуб раҳбари, Ўзбекистон журналистика ва оммавий коммуникациялар университети ректори Ш.Қудратхўжаев, «Тараққиёт стратегияси» маркази директори ўринбосари Б.Бекмуродов, Deutche Welle академияси координатори Л. Ранерт ва академия масъул ходими В.Рудник сўзга чиқиб, Ўзбекистонда давлат идораларининг ошкоралик ва шаффофлик тамойиллари бўйича олдинга қўйган қадамлари, замонавий журналистика ютуқлари ҳамда соҳа вакиллари ўртасида ўзаро тажриба алмашишни йўлга қўйишнинг муҳимлигини таъкидлади.
Хусусан, Ўзбекистонда етук журналистлар тайёрлаш ва уларнинг малакасини оширишга алоҳида эътибор қаратилаётгани, медиатузилмалар учун кенг имкониятлар яратилиб, замонавий кадрлар тайёрлаш тизими такомиллаштирилаётгани ҳақида маълумот берилди.
Тадбир давомида Deutsche Welle медиатузилмаси бугунги кунга қадар босиб ўтган фаолият йўли тақдимоти ўтказилди. Шунингдек, академия фаолияти, хорижий мутахассислар учун тақдим этиладиган ўқув курслари ва дастур ҳақида ахборот берилди.
Маълумот учун, Deutsche Welle («Немис тўлқини») телерадиокомпанияси Германиянинг хорижий тингловчилар ва томошабинларга мўлжалланган йирик медиатузилмаси бўлиб, 60 мамлакатда 3 мингга яқин ходими фаолият олиб боради. Телерадиокомпания аудиторияси қарийб 150 миллион кишини ташкил этади.
2004 йилда компаниянинг радио ва тележурналистлар малакасини ошириш маркази базасида академия ташкил этилган. Ушбу академиянинг асосий йўналишларидан бири замонавий ОАВни ривожлантириш, хусусан, халқаро стандартларга мос журналист кадрларни тайёрлашдан иборат.
Изоҳ (0)