Самарқанд шаҳрини кесиб ўтувчи Сиёб канали турли хил чиқиндилар, қурилиш ва маиший чиқиндилар билан тўлдириб ташланаётганлиги тўғрисида хабар берилган эди.
Ушбу хабардан сўнг Самарқанд вилоят Экология ва атроф-муҳитни муҳофаза қилиш бошқармаси, «Тоза ҳудуд» ДУК ва вилоят Санитария ва эпидимология маркази томонидан қатор рейдлар ўтказилиб, ҳолат бўйича фуқароларга нисбатан чоралар кўрилишига қарамасдан, Сиёб канали ва унинг атрофига чиқинди ташлаш ишлари давом этмоқда.
Бу ҳақда «Дарё» мухбири Фарҳод Норбўтаев хабар бермоқда.
Самарқанд шаҳрининг маркази, хусусан тарихий қисмидан оқиб ўтувчи ушбу каналнинг «Ёшлар» ва «Хумо» маҳалларидан ўтувчи қисмига турли чиқиндиларнинг ташланиши натижасида канал тўлиб бормоқда. Ачинарли томони шундаки, ушбу чиқиндилар ташланиши натижасида ариқдан қўланса ислар келиб чиқмоқда. Анчадан буён давом этиб келинаётган ушбу ҳолатга наҳотки барҳам беришнинг иложи тополмаса?
Айрим хонадон вакиллари очиқчасига ҳовлисига чиқинди ташлаб, ер майдонини сунъий равишда кенгайтирмоқда. Каналнинг чиқиндилар билан тўлиши натижасида ариқ бўйидаги айрим хонадонларда намлик юзага келган.
— Канал чиқиндилар билан тўлиши натижасида маҳалламизда жойлашган стадион, унинг спорт зали ва чўмилиш ҳавзаси сув билан тўлиб боряпти, — дейди Ашраф Боқиев. — 12 йилдан бери қаровсиз қолган стадионда 100 нафардан ортиқ бола футбол билан шуғулланади. Атрофдаги чиқиндилар натижасида қўланса ислар пайдо бўлган. Бу эса уларнинг саломатлигига жиддий хавф солмоқда.
Маълумот учун, Самарқандда жорий йилнинг 6 ойи давомида аҳоли яшаш пунктлари санитар ҳолатини яхшилаш, ҳамда Ўзбекистон Республикаси «Чиқиндилар тўғрисида»ги қонуни талабларининг жойларда бажарилиши бўйича рейдлар натижасида 247 нафар ҳуқуқбузарлик ҳолати аниқланиб, 43 060 000 сўм жарима солинган.
Самарқанд вилоят Экология ва атроф-муҳитни муҳофаза қилиш бошқармаси томонидан зарур чоралар кўрилишига қарамасдан, аҳоли каналга чиқинди ташлашда давом этмоқда.
Изоҳ (0)