11 август куни «Coca-Cola Ichimligi Uzbekiston, LTD» қўшма корхонаси ишга туширилганига 20 йил тўлди. Шу муносабат билан пойтахтнинг Бектемир туманида жойлашган ушбу корхонага медиатур ташкил этилди, деб ёзади «Халқ сўзи».
Корхона иш бошлаган дастлабки пайтда соатига 65 мингта 3 номдаги маҳсулот тайёрланар эди. Айни пайтга келиб, олтита линияда соатига 145 мингдан ортиқ, 9 номдаги ичимликлар ишлаб чиқариляпти. Ўзбекистонлик истеъмолчиларга бир йилда 503,2 миллион литр чанқовбосди ичимликлар етказиб берилмоқда.
— Корхона қувватини ошириш, янги линияларни ишга тушириш доимий эътиборимиз марказидаги масаладир, — дейди корхона бош директори ўринбосари Умар Турдиев. — Шу мақсадда 2018 йилнинг ўтган даврида 2 миллион 180 минг АҚШ доллари миқдорида инвестиция жалб этилди. Устувор режага кўра, йил охирига қадар 2 та янги линия фойдаланишга топширилиб, 100 га яқин қўшимча иш ўринлари яратилади.
Бугунги сана муносабати билан ишлаб чиқарила бошланган янги маҳсулот — қайноқ усулда қадоқланаётган янги таъмдаги чойнинг тақдимоти ҳам ўтказилди.
Изоҳ (0)