Интернет нашрларидан бирида эълон қилинган хабарда Тошкент шаҳрида Р.Очиловага нисбатан гўё ноқонуний тергов ҳаракатлари олиб борилаётгани билдирилди. Бу ҳақда ИИББ ахборот-мультимедиа маркази маълум қилди.
Қайд этилишича, 55 ёшли Р.Очилова ўзи раҳбарлик қилиб келаётган «Био-фарм Ҳаким» МЧЖ ва Goods Work Group МЧЖ ўртасида қуритиш ускуналарини етказиб беришга оид 65 миллион сўмлик қалбаки шартномани имзолаган. Мазкур ҳолат юзасидан Юнусобод туман прокуратураси томонидан «Био-фарм Ҳаким» мансабдор шахсларига нисбатан Жиноят Кодексининг 228-моддаси 2 ва 3 қисми (Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, кейинги тергов ҳаракатларини давом эттириш учун Тошкент шаҳар ИИББ ҳузуридаги Тергов бошқармасига юборилган.
Дастлабки тергов давомида Р.Очилова ҳужжатларни қалбакилаштиришдан ташқари, фирибгарлик йўли билан фуқаролар К.Баҳодир, Д.Илҳом ва Т.Шерзоднинг катта миқдордаги пул маблағларини ўзлаштириб олгани маълум бўлди. Жумладан, гумонланувчи Р.Очилова фуқаро К.Баҳодирга «Био-фарм Ҳаким» МЧЖнинг 25 фоизлик улушини ваъда қилиб, ундан 26.000 АҚШ доллари, Д.Илҳомга Хитой ва Тайвандан биоактив қўшимча ишлаб чиқаришга мўлжалланган ускуналарни олиб келиш учун 189.000 доллар ва Т.Шерзодга биргаликда биоактив қўшимча ишлаб чиқаришни ваъда қилиб 252 миллион 800 минг сўм миқдорида пул олган, бироқ ваъдасини бажармаган.
Шу йилнинг 25 июнь куни ушбу жиноят иши бўйича Р.Очилова гумонланувчи тариқасида жалб қилиниб, Жиноят-просессуал кодексининг 227-моддаси тартибида терговчининг қарорига асосан ушланган.
27 июнда эса Р.Очиловага Жиноят Кодексининг 168-модда 3-қисми «а» банди, 168-модда 2-қисми «а,в» бандлари, 228-модда 2-қисми «а,б» бандлари ва 228-модда 3-қисми билан айблов эълон қилинган.
Р.Очиловага нисбатан «қамоққа олиш» тарзидаги эҳтиёт чорасини танлаш юзасидан суд жараёни жиноят ишлари бўйича Юнусобод тумани судида, раислик этувчи С.Бурҳонов, судья ёрдамчиси И.Муҳидов, туман прокурори ёрдамчиси Ж.Усманов ва айбланувчининг ҳимоячиси И.Собиржонов иштирокида бўлиб ўтган.
Бундан ташқари, тергов органида Соғлиқни сақлаш вазирлигининг «Био-фарм Ҳаким» МЧЖга овқатга биологик фаол қўшимчаси ишлаб чиқариш учун 2011 йил 12 май куни берилган сертификатнинг 2014 йил 22 март кунида амал қилиш муддати тугагани ҳақидаги хулосаси ҳам мавжуд.
Изоҳ (0)