Ўзбекистонда бепул Lada автомобили ҳақидаги эски фейк оммалашиб кетди

Facebook’да Lada русумидаги автомобиль ўйналаётгани ҳақидаги 2016 йилги пост яна оммалаша бошлади, деб ёзади Spot.

Бир кеча-кундуздан камроқ вақт ичида унга 10 мингта янги изоҳ қолдиришди, яна шунча марта у билан бўлишишди.

Матнда айтилишича, Lada Vesta автомобилининг янги модели ўйналмоқда. Хусусан, саҳифа маъмурияти Ўзбекистон мустақиллигининг 27 йиллиги муносабати билан салондаги янги моделни ҳадя этиши айтилади.

Танловда қатнашиш учун постга «лайк» босиш, саҳифага обуна бўлиш, пост билан бўлишиш ва «қора» ёки «кумушранг» дея изоҳ қолдириш керак.

Ушбу пост эски «фейк» бўлиб, биринчи марта у 2016 йилда пайдо бўлган, ўшанда автомобиль мустақилликнинг 25 йиллиги муносабати билан совға қилиниши айтилган эди.

Ўзбекистондаги Lada компанияси расмий саҳифасида ушбу акцияга ҳеч қандай алоқаси йўқлигини билдирган.