Ўзбекистонда тадбиркорликни ривожлантириш ўзбек-ҳинд марказлари очилади

Ўзбекистон Савдо-саноат палатасида Ҳиндистоннинг Тошкентдаги элчихонаси билан ҳамкорликда ўзбек ва ҳинд тадбиркорлари учрашуви ташкил этилди. Бу ҳақда палата матбуот хизмати маълум қилди.

Тадбирда ҳозирда Ўзбекистон делегацияси таркибида Ҳиндистоннинг Деҳли шаҳрида бўлиб турган Ўзбекистон Савдо-саноат палатаси раиси Адҳам Икрамов видеоконференция орқали қатнашди. Шунингдек, Ҳиндистоннинг Ўзбекистондаги Фавқулодда ва мухтор элчиси Винод Кумар ҳам иштирок этди.

Ўзбекистон Савдо-саноат палатаси раиси иштирокчиларга жорий йилнинг 6—7- август кунлари Деҳли шаҳрида бўлиб ўтган Ҳиндистоннинг вазирлик, ташкилотлар ва йирик корхоналари билан учрашув ва музокаралар якунлари бўйича ахборот берди.

Хусусан, 6 август куни Деҳли 150 дан ортиқ Ҳиндистон корхоналари иштирокида 3 та бизнес-форум бўлиб ўтди. Ўзбекистон Савдо-саноат палатаси раисининг Ҳиндистон саноат конфедерацияси, Ҳиндистон савдо-саноат палаталари федерацияси, Ҳиндистон кичик ва ўрта бизнес Ассоциацияси ва тадбиркорлик субъектлари билан учрашувлари ўтказилди.

Юқорида қайд этилган учрашувлар доирасида томонлар жорий йилнинг 16—18 август кунлари Ўзбекистон ва Ҳиндистон ўртасидаги Савдо-иқтисодий ва илмий-техникавий ҳамкорлик бўйича ҳукуматлараро комиссиянинг навбатдаги йиғилиши ва унинг доирасида ташкил қилинувчи ўзбек-ҳинд бизнес форуми масалаларини муҳокама қилди.

Видеоконференцияда икки мамлакат ишбилармон доираларининг савдо-сотиқ, фармацевтика, тўқимачилик, тиббиёт, туризм, логистика каби соҳаларда ҳамкорликни янада ривожлантириш бўйича таклиф ва тавсиялари тингланди.

Ўзбекистон Савдо-саноат палатаси томонидан ҳар бир таклиф ҳинд ҳамкор ташкилотларини жалб этган ҳолда қўшимча равишда ўрганиб чиқилиб, уларнинг ечими бўйича маълумотлар Қўшма савдо-иқтисодий ва илмий-техникавий ҳамкорлик бўйича ҳукуматлараро комиссияга кўриб чиқиш учун юборилиши таъкидланди.

Маълумот учун, ҳозирда Ҳиндистон тадбиркорликни ривожлантириш институти билан ҳамкорликда Тошкент шаҳрида ва республика ҳудудларида «Тадбиркорликни ривожлантириш ўзбек-ҳинд марказлари»ни ташкил этиш устида иш олиб борилмоқда.