IV Халқаро армия ўйинлари доирасида Москва вилоятининг Дмитров шаҳрида ўтказилаётган кинология хизмати итлари ўртасидаги «Содиқ дўст» танловнининг 300 метрли тўсиқлар йўлагидан ўтишда Ўзбекистон Мудофаа вазирлиги Марказий хизмат итлари питомниги ҳарбий хизматчиси Шокир Жўраевининг «Гита» лақабли хизмат ити 1 дақиқаю 15 сония натижа билан рекорд ўрнатди. Бу ҳақда вазирлик матбуот хизмати хабар берди.
Бу танловда «Гита» лақабли Бельгия овчаркаси – Малинуа нафақат рекорд натижа билан, балки «Ҳимоя хизмати» шартидаги эхтимолий душманни ушлаш жараёнида уни сакраб бўйнидан йиқитганида ҳам экспертлар диқатига сазовор бўлди. «Ўзи кичкина бўлса-да, юраги катта ит экан», – дея эътироф этди ҳакамлар ҳайъати аъзолари.
«Содиқ дўст» танловида етти мамлакат ҳарбий хизматчилари ўз кинология хизмати итлари билан иштирок этмоқда. Дог-биатлон (индивидуал пойга) шартида Ўзбекистоннинг хизмат итлари 4-ўринни, танловнинг иккинчи шарти – 300 м тўсиқли йўлакдан ўтишда 2-ўринни ва Ҳимоя хизмати (шартли қоидабузарни ушлаш) шартида 3-ўринни эгаллаб келмоқда. Навбатдаги шарт – Дог биатлон (эстафета) 4 август куни ўтказилади. Ўзбекистон Мудофаа вазирлигидан вакиллик қилаётганларнинг таъкидлашича, ҳарбий хизматчилар ва хизмат итлари кейинги шартга тайёрглик даражаси юқори.
Эслатиб ўтамиз, «АрМИ—2017» доирасида ўзбекистонлик ҳарбий кинологлар учинчи ўринни қўлга киритишган эди.
Изоҳ (0)