Францияда Савдо-иқтисодий ҳамкорлик бўйича Ўзбекистон — Франция ҳукуматлараро комиссиясининг навбатдаги мажлиси бўлиб ўтди. Унда икки томонлама савдо алоқаларининг ҳозирги ҳолати ва бу борадаги истиқболли йўналишлар муҳокама қилинди. Бу ҳақда Ташқи савдо вазирлиги матбуот хизмати хабар берди.
«Айни пайтда Ўзбекистоннинг Францияга хом ашё бўлмаган экспорти у қадар катта ҳажмларга эга эмас. Бу асосан маҳаллий маҳсулотларнинг талабчан Европа бозорларига чиқишдаги қийинчиликлар билан боғлиқ. Биз стандартларимизни Евроиттифоқ талабларига мувофиқлаштириш йўли орқали ўзбек маҳсулотларини Европа бозорларига чиқаришни максимал даражада енгиллаштириш учун Европа Иттифоқи, жумладан, Франция билан музокаралар олиб боряпмиз. Фақат шу йўл билан мева-сабзавот ва тўқимачилик маҳсулотлари экспортидаги мавжуд салоҳиятни рўёбга чиқара оламиз», дейди Ташқи савдо вазири Жамшид Хўжаев.
Сафар давомида Франция қишлоқ хўжалиги ва озиқ-овқат вазирлиги, Фитосанитария департаменти, Агрономия, ветеринария ва ўрмончилик институти мутасаддилари билан ҳам учрашувлар ташкил этилди.
Шунингдек, мамлакат делегацияси сархил маҳсулотлар улгуржи савдоси бўйича дунёдаги энг йирик бозор — «Ранжис»да бўлди. Бозор президенти Л.Лаяни билан мулоқот чоғида ўзбек маҳсулотларини Францияда илгари суриш мақсадида семинарлар ўтказиш ҳамда аккредитация масалаларида ҳамкорлик қилишга келишиб олинди.
«Ранжис» раҳбарияти мамлакат экспорт салоҳиятини ўрганиш ҳамда қишлоқ хўжалиги маҳсулотларини сотиш бўйича Франциянинг илғор тажрибасини жорий этиш имкониятларини ўрганиш мақсадида Ўзбекистонга ташриф буюриш истагини билдирди.
Маълумот учун, Париж жанубида, Орли халқаро аэропорти яқинида жойлашган «Ранжис» мева-сабзавот маҳсулотлари савдоси бўйича дунёдаги энг йирик улгуржи бозорлардан бўлиб, 2017 йилдаги товар айланмаси умумий қиймати 9 миллиард еврога тенг 3,5 миллион тонна турли озиқ-овқат маҳсулотларини ташкил этди. Шундан 32 фоизи экспортга йўналтирилган.
Музокаралар якунида Франция қишлоқ хўжалиги вазирлиги томонидан ўзбек қовунлари ва анорига қўйилган фитосанитар чекловлар олиб ташланди. Ўзбекистондан беҳи, хурмо, олхўри, қорағат ва бошқа қишлоқ хўжалиги маҳсулотларини ушбу давлатга олиб киришга қўйиладиган карантин талаблари кўриб чиқиш учун тақдим этилди.
Изоҳ (0)