2017 йил давомида марказлар орқали жами 120 000 та хизмат кўрсатилган бўлса, 2018 йилнинг апрель—июнь ойларининг ўзидагина 1 миллион 35 минг хизмат аҳолига тақдим этилди. Бу ҳақда давлат хизматлари агентлиги матбуот хизмати «Дарё»га хабар бермоқда.
Агар 2017 йилда марказлар орқали кўрсатиладиган хизмат турлари 32 тани ташкил этган бўлса, ҳозирда хизмат турлари 100 тага етказилди. Яъни, 3 бараварга ошди.
Аҳолига хизмат кўрсатиш жараёнини таҳлил қилишда агентлик ва унинг ҳудудий бошқармалари томонидан 2018 йилнинг 6 ойи давомида 9 829 та қонун бузилиши аниқланди. Қонун бузилишларнинг 5 705 таси ҳокимлик органлари, 776 таси муҳандислик-коммуникация тармоқларига улаш, 538 таси қурилиш ва 47 таси кадастр идоралари ҳиссасига тўғри келди.
Аниқланган қонунбузилиши ҳолатлари юзасидан 4 мингга яқин таъсир чоралари қўлланилиб, 183 нафар шахс интизомий жавобгарликка тортилган, 30 нафар шахс вазифасидан озод этилган, 155 нафар шахс эса маъмурий жавобгарликка тортилган.
Тақдим этилаётган хизматлар турларининг ортиши марказларга одамлар оқими кўпайишига олиб келмоқда. Жумладан, агар 2017 йилда марказларга 1 кунлик аҳоли оқими ўртача 20—40 кишини ташкил этган бўлса, 2018 йилда бу кўрсаткич 350—600 тани ташкил этмоқда.
Изоҳ (0)