Наманган вилоятининг Чортоқ туманида яшовчи А. Ш. ўзаро жанжал оқибатида акасининг турмуш ўртоғи ҳамда икки нафар қизини тош билан уриб жароҳатлади. Бу ҳақда «Дарё»га вилоят ИИБ матбуот хизмати хабар берди.
1974 йилда туғилган аёл ва унинг 1992 ва 1995 йилларда таваллуд топган қизлари туман тиббиёт бирлашмасининг жонлантириш бўлимига ётқизилди. Бироқ, шифокорлар томонидан кўрсатилган тиббий муолажаларга қарамай, кенжа қиз бош мия очиқ шикастланиши, пешона соҳасининг йиртилган жароҳатлари оқибатида ҳаётдан кўз юмди.
Мазкур хонадонда узоқ муддатдан буён давом этиб келаётган оилавий можарога фарзандларнинг ҳовли-жой талашиши сабаб бўлгани билдирилмоқда. Гарчи ҳовли-жой маҳалла фаоллари томонидан келишув ва ўзаро розилик асосида тақсимлаб берилган бўлса ҳам, ўртадаги низо ҳодисага қадар давом этиб келган.
Ҳозирда мазкур ҳолат юзасидан терговга қадар текширув ҳаракатлари олиб борилмоқда.
Изоҳ (0)