Ўзбекистон ёшлар иттифоқи ШҲТ Ёшлар кенгашига аъзо бўлди

Ўзбекистон ёшлар иттифоқи делегациясининг Хитойга сафари якунланди. Бу ҳақда ЎзА хабар бермоқда.

Мазкур сафар натижаларга бой бўлди. Жумладан, ШҲТ Ёшлар кенгашининг 2018—2019 йилларга мўлжалланган иш режаси қабул қилиниб, Ўзбекистон делегацияси томонидан 6 та халқаро аҳамиятга эга лойиҳа ташаббуси илгари сурилди.

Умумхитой ёшлар федерацияси кўмагида самарали фаолият юритаётган 25 нафар бизнес вакиллари билан учрашувлар ташкил этилди. Ўзбекистоннинг барча ҳудудларида ёшлар боғлари барпо этиш ҳамда ҳар бир туман-шаҳарларда 3 D ва 5 D кинотеатрлар тармоғини йўлга қўйиш, электрон тижорат инфратузилмасини ривожлантириш, ёш тадбиркорлар учун бизнес ўқув курсларини ташкил қилиш ҳамда коворкинг марказлари миллий брендини яратиш бўйича дастлабки келишувларга эришилди.

Мазкур келишувлар доирасида жорий йилнинг сентябр-октябр ойлари давомида Хитойнинг 100 дан ортиқ, Россиянинг 40 нафар бизнес вакилининг Ўзбекистонга ташрифи бўйича йўл харитаси тузилди.

Ўзбекистонга стратегик шерик бўлган давлатлар ёшлар ташкилотлари билан ҳамкорлик алоқаларини янада ривожлантириш мақсадида икки томонлама мулоқотлар амалга оширилди.

Жумладан, Умумхитой ёшлар федерацияси раиси Хе Жун Ке билан расмий учрашув ташкил этилди. Ҳамкорликнинг амалий асоси сифатида англашув меморандуми имзолаш масалалари муҳокама қилинди. Беларусь ёшлар иттифоқи билан икки томонлама расмий учрашув ташкил этилиб, ўзаро ҳамкорлик шартномаси имзоланди. Ҳамкорлик доирасида ўзаро кўнгилли ёшлар фаолиятини йўлга қўйиш, ёшлар туризмини ривожлантириш ҳамда ёш фермерлар учун икки томонлама ҳамкорликни йўлга қўйиш бўйича келишиб олинди.

Шунингдек, Афғонистон, Мўғулистон ва Озарбойжон вакиллари билан ҳам расмий учрашувлар ташкил этилиб, ўзаро ҳамкорлик масалалари муҳокама этилди.

Ўзбекистоннинг Хитойдаги элчихонасида ушбу давлатга ўқиётган ва ишлаётган ўзбекистонлик ёшлар билан учрашув ташкил этилиб, улар томонидан келажакда мамлакатга қайтиб, эгаллаган илғор тажрибалари асосида фаолиятларини йўлга қўйиш масаласи муҳокама этилди. Ўзбекистон ёшлари умумжаҳон ассоциациясининг Хитойдаги вакили ва координатори сайланди.

Энг муҳими, Умумхитой ёшлар федерацияси ташаббуси билан ўтказилган ШҲТ Ёшлар кенгашининг навбатдаги йиғилишида Ўзбекистон ёшлар иттифоқи ШҲТ Ёшлар кенгашига тенг ҳуқуқли аъзо сифатида қабул қилинди.