Тожикистон Республикаси маданият вазири Шамсиддин Орумбекзода бошчилигидаги Тожикистон дўстлик делегацияси Ўзбекистонга келди. Бу ҳақда ЎзА хабар бермоқда.
Тожикистон делегацияси Ўзбекистон Ёзувчилар уюшмасига ташриф буюрди. Учрашувда Ўзбекистон Ёзувчилар уюшмаси раиси Сирожиддин Саййид, Тожикистон Республикаси маданият вазири Шамсиддин Орумбекзода ва бошқалар ўзбек ва тожик халқларини кўп асрлик дўстлик ва яхши қўшнилик ришталари, умумий тарих, ягона дин, маданият, урф-одат ва анъаналар муштараклиги боғлаб туриши, сўнгги йилларда икки давлат раҳбарларининг ташаббуслари билан турли жабҳаларда ўзаро манфаатли ҳамкорлик ривожланиб бораётганини таъкидлади.
Тожик халқи Ҳазрат Навоийни, ўзбек адабиётини қанчалар эъзозласа, ўзбек халқи ҳам Абдураҳмон Жомийни, тожик адабиётини шунчалар қадрлайди. Самарқанд шаҳрида ўзбек ва тожик адабиётининг икки буюк мутафаккири – Алишер Навоий ва Абдураҳмон Жомий ҳайкали ўрнатилди. Тожикистон Президенти Душанбедаги Беҳзод кўчасида жойлашган истироҳат боғининг номини «Низомиддин Алишер Навоий» деб қайта номлаш, у ерда ўзбек ва тожик халқлари дўстлигининг рамзи сифатида Алишер Навоий ва Абдураҳмон Жомий ҳайкалларини ўрнатишга қарор қилди. Буларнинг барчаси Ўзбекистон билан Тожикистон ўртасида адабиёт соҳасидаги алоқаларни мустаҳкамлашга хизмат қилади.
Ташриф доирасида Тожикистон делегацияси пойтахтдаги Ҳазрати Имом мажмуасини зиёрат қилди.
Изоҳ (0)