Ўзбекистон Мудофаа вазирлиги Ҳарбий автомобиль назорати ходимлари ҳам «АрМИ—2018»да иштирок этмоқда

Москва олий умумқўшин қўмондонлик билим юртига қарашли «Ногинск» полигонида «АрМИ—2018» Халқаро армия ўйинлари доирасида бўлиб ўтаётган «Йўл патрули» мусобақасининг очилиш маросими бўлиб ўтди ва беллашувга старт берилди. Бу ҳақда Мудофаа вазирлиги матбуот хизмати «Дарё»га маълум қилди.

Таъкидлаш керакки, ўзбекистонлик ҳарбий хизматчилар Халқаро армия ўйинларининг мазкур йўналишида иккинчи бор иштирок этмоқда. Ўтган йилда улар 3-ўринни қўлга киритган эди.

Мусобақани ўтказишдан асосий мақсад ҳарбий полиция йўналишида ҳарбий-техник ҳамкорликни кенгайтириш, хизматчиларнинг профессионал тайёргарлик даражасини ошириш ва ҳарбий автотранспорт воситаларидан фойдаланган ҳолда йўл ҳаракати хавфсизлигини таъминлашдан иборат.

Мудофаа вазирлиги Ҳарбий автомобиль назорати инспекцияси бошлиғи подполковник Баҳодир Аннаев мазкур танловда гуруҳ раҳбари сифатида иштирок этмоқда.

Танловнинг очилиш маросими якунида томошабинлар эътиборига ҳарбий автомобиллар инспекцияси гуруҳи томонидан «автомобиль вальси» ҳамда «гуманитар колоннага ҳужум қилган террорчилар хавфини бартараф этиш» номли кўргазмали чиқишлари намойиш этилди.

«Мутахассислар беллашуви» ва «Ҳарбий-техник эстафета» йўналишлари бўйича ўтказилаётган мусобақа 5 августга қадар давом этади.