Тошкентнинг Югнакий массивида 67 та дарахт кесилди

Тошкентнинг Югнакий массивида 67 та дарахт кесиб ташланди. Дарахтларни кесиш бундан 2 ой олдин бошланган, деб ёзмоқда «Potrebiteli.uz».

«Potrebiteli.uz»нинг маълум қилишича, 31 июль куни ҳудудда яқиндагина кесилган 17 та дарахтнинг кундаси аниқланган. Қорасув каналининг бўйидаги дарахтлар кесиб ташланган.

Биоинспекция раҳбари Акмал Исматов Югнакий массивида ҳеч қандай дарахт кесишга рухсат берилмагани ҳақида маълум қилган. Ваҳоланки, қонунчиликка кўра, Биоинспекция рухсатисиз дарахт кесиш жазога тортилади.

Воқеа жойига етиб келган биоинспекция раҳбари Акмал Исматов ва инспектор Жамшид Қодиров кесилган дарахтлар кундаларининг диаметрини ўлчаб, уларнинг тури ва ёшини ҳужжатларга қайд этган.

— Биз дарахт кесишга ҳеч қандай рухсат бермаганмиз, — дейди Акмал Исматов. — Бизга ҳеч ким мурожаат ҳам қилгани йўқ. Шунча дарахтни кесиб ташлаш ақлга сиғмайди. Биз бунга рухсат бермаган бўлар эдик. Негаки бунга ҳожат ҳам йўқ. Автомобильлар тўхташ ерини қуриш учун шусиз ҳам жой етарли эди.

Маҳаллий аҳолининг айтишича, дарахт кесиш учун келганлар ҳеч қандай ҳужжат тақдим қилмаган ва ўзларини ҳукумат вакиллари деб таништирган. Шу ерда истиқомат қилувчи Людмила Глумова дарахтларнинг кесилишига норозилик билдирган, бироқ унга ҳеч ким қулоқ солмаган.

Мирзо Улуғбек тумани жамоатчилик кенгаши вакили Наиля Гарифуллина гувоҳларнинг кўрсатмаларини ёзиб олган ва уларни туман ҳокимлигига тақдим қилиш учун ҳужжатлаштирган.

«Актда 17 та дарахтнинг кесилгани қайд қилинган, негаки айнан шунча дарахтнинг кундасини ўз кўзимиз билан кўрдик. Аслида дарахтлар сони бундан анча кўпроқ эди. Агар буни исботлашга муваффақ бўлсак, етказилган зарар учун жарима миқдори ошади. Бироқ бунинг учун кесилган дарахтларнинг суратлари керак. Улар эса йўқ. Дарахтлардан қолган кундалар йўқ қилинган. Демак бу ишни қилганлар жиноятга қўл ураётганини билган ва ўз қилмишининг изларини йўқотмоқчи бўлган», — деб ёзмоқда «Potrebiteli.uz».

Биоинспекция томонидан ҳужжатлаштирилган маълумотлар ҳуқуқшуносларга топширилган. Жамоатчилик кенгаши томонидан прокуратура ва Олий Мажлисга юбориладиган хатлар тайёрланган.