Тошкентдаги Вестминстер университетида «Инновацион ривожланиш вазирлиги ва «Buyuk Kelajak» экспертларининг ўзаро ҳамкорлик платформасини шакллантириш» мавзусида конференция бўлиб ўтди. Бу ҳақда «Дарё»га вазирлик матбуот хизмати маълум қилди.
Конференцияда Инновацион ривожланиш вазирлиги раҳбарияти, бошқарма ва бўлим бошлиқлари ҳамда АҚШ, Европа, Япония ва Россияда фаолият кўрсатаётган ўзбекистонлик олимлар ва турли соҳа экспертлари иштирок этди. «Buyuk Kelajak» экспертларининг айримлари тадбирда шахсан иштирок этган бўлса, бошқалари видео-конференция орқали қатнашди.
Инновацион ривожланиш вазири Иброҳим Абдураҳмонов хорижда фаолият кўрсатаётган ўзбекистонлик экспертларга республикамизда инновацион ривожланиши борасида олиб борилаётган ислоҳотлар ҳақида маълумот берди. Сўнгра вазирлик вакиллари ва «Buyuk Kelajak» экспертлари Ўзбекистон Республикасининг 2021 йилгача инновацион ривожланиш стратегиясини, қабул қилинган ва лойиҳаси тайёрланаётган қонунчилик ҳужжатларини муҳокама қилди.
Конференцияда, шунингдек, вазирлик фаолият йўналишларида «Buyuk Kelajak» экспертлари билан яқиндан ҳамкорлик қилиш мақсадида вазирлик бошқармалари ва «Buyuk Kelajak» экспертларидан иборат ишчи гуруҳлар тузилди.
Конференция иштирокчилари кўплаб масалаларни муҳокама қилиб, фикр алмашди, турли соҳаларга доир аниқ таклифлар, истаклар билдирди. Жумладан, «Buyuk Kelajak» экспертлари Ўзбекистондаги ҳукумат виртуал қабулхоналари, порталларини фақат мурожаат ва шикоятларни қабул қилувчи платформа эмас, балки тушаётган саволларга жавобларни ҳам акс эттирувчи ахборот тизимига айлантириш вақти келганини айтди. Шунда маълум муаммо билан чиқишни истаган фуқаро худди шу масала бўйича олдинроқ мурожаат қилган фуқарога берилган жавоб билан танишиб, ўзини қийнаётган масалага ойдинлик киритиб олиши, портал фуқароларнинг ҳуқуқий билимларини оширишга хизмат қилувчи манбага айланиши мумкинлиги таъкидланди.
Инновацион ривожланиш вазирлиги мутахассислари бугунги кунда тадқиқотлар натижаларини тижоратлаштириш масаласи долзарб эканлигини инобатга олган ҳолда илмий-текшириш муассасалари ходимларини маркетинг асосларига ўргатиш зарурлиги ҳақида гапирди. Илм-фан натижаларини бозорга олиб чиқиш, уни харидорини топиш анчайин мушкул экани, айрим ҳолларда эса уларни умуман сотиш имконияти йўқлиги боис, энди илмий ишланмаларни муайян буюртмачиларнинг таклифларига биноан яратиш тизимини ишга тушириш лозимлиги билдирилди. Бунда олимлар, тадқиқотчилардан маркетолог бўлиш ҳам талаб этилади. Айнан олимларни шу соҳада билимга эга бўлишлари учун хорижлик экспертларни жалб қилиш мақсадга мувофиқлиги қайд этилди.
Изоҳ (0)