Facebook ижтимоий тармоғи асосчиси Марк Цукерберг компания акциялари қийматининг тушиши оқибатида 16,8 миллиард доллар йўқотди. Бу ҳақда Bloomberg’га таяниб, «Корреспондент.net» хабар берди.
Facebook акциялари компаниянинг чорак давр бўйича ҳисоботи эълон қилинганидан кейин арзонлаган. Ҳисоботда ижтимоий тармоқ даромадларининг ўсиш суратлари пасайгани ҳақида маълумотлар келтирилган эди.
Ҳисоботга кўра, чорак давр мобайнида компания даромади 5,12 миллиард долларни ташкил қилган. 2017 йилинг мос даврида компания 3,89 миллиард даромад олган. Компания ҳисоботи эълон қилинганидан кейин таҳлилчилар ижтимоий тармоқнинг кейинги фаолияти бўйича салбий башоратларини илгари сурди.
Bloomberg маълумотларига қараганда, Facebook акциялари арзонлашишда давом этса, Цукерберг дунёнинг энг бадавлат кишилари рўйхатида 6-ўринга тушиб қолади. Айни пайтда Facebook асосчиси агентлик тузган рўйхатда 3-ўринни эгалламоқда.
Изоҳ (0)