Ўзбекистон Президенти «Миллий киноиндустрияни ривожлантириш бўйича қўшимча чора-тадбирлар тўғрисида»ги қарорни имзолади. Ҳужжат матни ЎзА томонидан келтирилди.
Қарорга мувофиқ, «Ўзбеккино» Миллий агентлиги, Молия ва Адлия вазирликлари, Рақобат қўмитаси ҳамда «Ўзбекфильм» АЖ акциядорларининг қуйидаги таклифларига розилик берилди:
«Ўзбекфильм» акциядорлик жамиятини жамият таркибидан чиқиб кетадиган акциядорлар билан ҳисоб-китобни амалга оширган ҳолда «Ўзбекфильм» давлат унитар корхонаси сифатида қайта ташкил этиш;
«Ҳужжатли фильмлар киностудияси» давлат унитар корхонасини мамлакатнинг давлат ва жамият ҳаётида амалга оширилаётган бунёдкорлик ишларининг энг муҳим йўналишларида эришилган ютуқларни тасвирга олиш ва уларни кейинчалик архивлаштириш бўйича вазифаларни юклаган ҳолда «Ҳужжатли ва хроникал фильмлар киностудияси» давлат унитар корхонаси сифатида қайта номлаш;
«Ўзбеккино» МАнинг ҳудудий бўлинмалари негизида уларнинг штатлар сони, бино ва бошқа моддий-техника базаси, шунингдек, 2020 йилнинг 1 январига қадар муддатда амалдаги молиялаштириш манбаларини сақлаган ҳолда «Республика кинопрокат маркази» давлат унитар корхонасининг филиалларини ташкил этиш;
«Ўзбекистон киноарбоблари ижодий уюшмаси» давлат муассасасини унинг балансида бўлган мол-мулк ва бошқа моддий-техник қимматликларни (кўчмас мулкни бепул фойдаланишга) топшириш орқали нодавлат нотижорат ташкилоти сифатида қайта ташкил этиш.
Адлия вазирлигига бир ой муддатда янги ташкил этиладиган нодавлат нотижорат ташкилотини давлат рўйхатидан ўтказилишини таъминлаш топширилди.
Изоҳ (0)