Инновацион ривожланиш вазирлиги илмий-техник кенгашларининг 15 та сексия йиғилиши ўтказилди. Бу ҳақда «Дарё»га вазирлик матбуот хизмати маълум қилди.
Кенгашлар Ўзбекистон Республикасини инновацион ва илмий-техник ривожлантириш соҳасида жамият ва давлат ҳаётини ҳар томонлама ривожлантиришга, мамлакатнинг интеллектуал ва технологик салоҳиятини оширишга қаратилган ягона давлат сиёсатини амалга оширувчи Инновация вазирлигининг фан тармоқлари ва соҳалари бўйича маслаҳат органлари сифатида ташкил қилинди.
Инвестиция лойиҳаларининг лойиҳаолди ҳужжатлари белгиланган тартибда фақат Кенгашларнинг ижобий хулосасидан кейин ваколатли органларга экспертиза қилиш, тасдиқлаш учун киритилади.
Кенгашларнинг таркиби вазирлик ходимлари, вазирликлар, идоралар, иқтисодиёт тармоқлари, ишлаб чиқариш корхоналарининг раҳбарлари, етакчи олимлар ва малакали мутахассислардан иборат бўлиб, кенгашлар ва эксперт гуруҳлари фан ва технологиялар тараққиётининг қуйидаги устувор йўналишлари бўйича тузилди: «Тарих ва ижтимоий фанлар», «Филология, психология ва педагогика фанлари», «Иқтисодиёт ва ҳуқуқ фанлари» «Математика ва физика фанлари», «Техника фанлари», «Ахборотлаштириш ва ахборот-коммуникация технологияларини ривожлантириш», «Қишлоқ хўжалиги ва атроф муҳит муҳофазаси», «Тиббиёт», «Фармакология ва фармацевтика», «Кимёвий технологиялар ва нанотехнологиялар», «Ер тўғрисидаги фанлар», «Биология фанлари», «Кимё фанлари», «Археология фанлари», «Ўрмон хўжалиги фанлари».
Илмий-техникавий кенгашлар, жумладан, тақдим этилган илмий лойиҳа ва грантларнинг таҳлили натижалари асосида лойиҳа ва грантларни танловларда иштирок этиш учун рухсат берувчи орган ҳисобланади. Шунингдек, улар дастурлар ва лойиҳаларни бажарилиш мониторинги, оралиқ назорат натижалари таҳлили асосида лойиҳаларни давом эттириш ёки бажарилиши қониқарсиз деб топилган лойиҳаларни тўхтатиш тўғрисида вазирликка таклифлар киритади.
Ҳозирда кенгашлар ўз йўналишлари бўйича грант мавзуларини ишлаб чиқиш билан шуғулланмоқда. Тез кунларда таклиф этилган мавзулар бўйича Инновация вазирлиги томонидан илмий-тадқиқотлар, ишланмалар ва лойиҳаларга грантлар танлови эълон қилинади.
Изоҳ (0)