Тарих фанлари доктори, профессор, халқаро «Антик дунё» академияси аъзоси Раҳмон Машарипов қарийб олтмиш йил давомида уйида ажойиб кутубхона ва «Тожмаҳал» деб номланган тарих ҳамда ўлкашунослик музейини ташкил қилди. Бу ҳақда «Халқ сўзи» хабар берди.
— Йиллар давомида тўплаган бойлигим мана шу мў’жазгина ҳовли-жойимнинг тенг ярмини эгаллаган. Улар 12 тилда чоп этилган 10 мингдан ортиқ илмий, бадиий, тарихий китоблар, тарих ва этнографияга оид мингдан зиёд музей экспонатлари, ноёб фотосуратлардан иборат. Уйимнинг қолган қисмида фарзандларим, невара-чевараларим билан истиқомат қиламан. Ҳар ой нафақа пули қўлимга тегиши билан янги китоблар харид қилиш учун вилоят марказидаги китоб дўконларига бораман. Бу менга одат бўлиб қолган. Аммо шу ўринда бир кичик муаммони айтиб ўтмасам бўлмас. Гап шундаки, тўпланган қадимий осори-атиқаларнинг бир қисмига жой етишмаяпти. Шу боис маҳаллий ҳокимлик бино масаласида имконият даражасида кўмаклашса, музей ҳамда кутубхона фаолиятини янада кенгайтирар эдим, — дейди Раҳмон бобо.
Дарвоқе, бобо очган кутубхонанинг бошқаларидан фарқли яна бир жиҳати бор: мазкур масканда дам олиш куни ва соати белгиланмаган.
Изоҳ (0)