12 июль куни «Ёш китобхон» танловининг иккинчи мавсуми саралаш босқичи республика бўйлаб ўз ишини бошлади: шу куни 20-30 ёш тоифасидагилар саралаш босқичи тест синовларидан ўтган бўлса, эртасига 15-19 ёшлилар ўз билимларини синаб кўрди. Бу ҳақда «Дарё»га Ёшлар медиа маркази маълум қилди.
«Ёш китобхон» танловининг саралаш босқичи иштирокчилари ҳар бир вилоят ва туман-шаҳарларда ташкил этилган, керакли жиҳозлар билан жиҳозланган махсус хоналарда тест синовларини топшириш учун жам бўлди.
Иштирокчиларга тест топшириш қоидалари бўйича тушунтириш берилади. Тест синовида ёшлар ўзбек ва жаҳон адабиёти, буюк адиблар ҳаёти ва ижодига оид 50 та тест саволига 25 дақиқа давомида жавоб бериши лозим.
Ҳар бир тўғри жавоб учун 2 баллдан белгиланади. Иштирокчилар натижалари сақлаб қолинади (электрон кўринишда ва имзоланган ҳолда қоғозда). Тест натижаларига кўра 86 ва ундан юқори балл тўплаган иштирокчилар кейинги (иккинчи) босқичда иштирок этиш ҳуқуқини қўлга киритади.
«Ёш китобхон» танловининг 3 ёш тоифаси бўйича саралаш босқичлари шу тартибда кетма-кет уч кунда ўтказилади.
Маълумот учун, барча туман (шаҳар)ларда 12 июль куни 20-30 ёш тоифаси бўйича ўтказилган саралаш босқичида жами 87828 нафар ёш иштирок этди. 1128 нафар иштирокчи 86 ва ундан юқори балл олиб, танловнинг 2-босқичида иштирок этиш имкониятига эга бўлди.
Изоҳ (0)