Tarix fanlari doktori, professor, xalqaro “Antik dunyo” akademiyasi a’zosi Rahmon Masharipov qariyb oltmish yil davomida uyida ajoyib kutubxona va “Tojmahal” deb nomlangan tarix hamda o‘lkashunoslik muzeyini tashkil qildi. Bu haqda “Xalq so‘zi” xabar berdi.
— Yillar davomida to‘plagan boyligim mana shu mo‘’jazgina hovli-joyimning teng yarmini egallagan. Ular 12 tilda chop etilgan 10 mingdan ortiq ilmiy, badiiy, tarixiy kitoblar, tarix va etnografiyaga oid mingdan ziyod muzey eksponatlari, noyob fotosuratlardan iborat. Uyimning qolgan qismida farzandlarim, nevara-chevaralarim bilan istiqomat qilaman. Har oy nafaqa puli qo‘limga tegishi bilan yangi kitoblar xarid qilish uchun viloyat markazidagi kitob do‘konlariga boraman. Bu menga odat bo‘lib qolgan. Ammo shu o‘rinda bir kichik muammoni aytib o‘tmasam bo‘lmas. Gap shundaki, to‘plangan qadimiy osori-atiqalarning bir qismiga joy yetishmayapti. Shu bois mahalliy hokimlik bino masalasida imkoniyat darajasida ko‘maklashsa, muzey hamda kutubxona faoliyatini yanada kengaytirar edim, — deydi Rahmon bobo.
Darvoqe, bobo ochgan kutubxonaning boshqalaridan farqli yana bir jihati bor: mazkur maskanda dam olish kuni va soati belgilanmagan.
Izoh (0)