Ички ишлар вазирлиги академиясида мутлақо янги тизим яратилиб, ушбу йилдан бошлаб қабул тест синовларисиз, махсус касбий танлов ва якка тартибдаги суҳбат орқали амалга оширила бошлади. Андижонлик абитуриентнинг отаси Шукрулло Маматов маълум қилишича, дастлабки танлов босқичларидан муваффақиятли ўтгач, ўғлининг ҳужжатлари академиянинг қабул комиссиясига келиб тушган. Тиббий кўрикдан ҳам худди шундай ҳалоллик билан ўтказилган.
Академиянинг қабул комиссияси номзодларни адолатли ва холисона баҳолаш учун уларга махсус рақамли карточкалар бериб, абитуриентларнинг исмлари синов қабул қилувчилардан сир тутилди.
Номзодларнинг ёзма иш, жисмоний тарбия ва чет тилларидан билим даражаси ошкора тарзда синовдан ўтказилиб, адолатли баҳоланди. Синовдан ўтган абитуриентлар якка тартибда ўтказиладиган якуний суҳбатга киритилди.
Якка тартибда ўтказилган суҳбатда «Ҳуқуқшунослик», «Ўзбекистон тарихи», «Жаҳон тарихи», «Адабиёт», «Маънавият асослари» ва «Миллий истиқлол ғояси» бўйича номзодларнинг асосий тушунчалари холисона баҳоланди. Ҳар бир абитуриент ўзи танлаган билетдаги саволларга оғзаки шаклда жавоб берди. Бунда ҳар бир суҳбат видеотасмаларга ёзиб борилди.
Суҳбат натижалари 5 июль куни, имтиёзли ўқишга қабул қилинадиган номзодлар бўйича эса натижалар 9 июль куни эълон қилинди.
Изоҳ (0)