Ўзбекистон Марказий банки сўровида иштирок этганларнинг аксарияти Ўзбекистонда доллар курси сентябрь охирига келиб, 7600—7800 атрофида бўлади, деб ҳисоблайди. Бу ҳақда Spot Марказий банкнинг 2018 йилнинг биринчи ярмида иқтисодиётда кузатилган инфляцион кутилмалар тўғрисидаги ҳисоботига таяниб хабар берди.
Январь июнь ойларида ўтказилган сўровда бутун мамлакат бўйлаб 750 нафар жисмоний шахс ва 300 юридик шахс қатнашди.
Жорий йилнинг III чораги охирида миллий валюта алмашув курси 7800 сўмдан паст даражада бўлишини кутаётган аҳолининг улуши 48 фоизни ва тадбиркорлик субъектларининг улуши 52 фоизни ташкил этди. Сўровда иштирок этган жисмоний шахсларнинг 29 фоизи ва юридик шахсларнинг 38 фоизи эса сентябрь охирида миллий валюта алмашуви курси 7800—8000 сўм оралиғида бўлишини кутаётганликларини билдиришган.
Шунингдек, жорий йил охирида миллий валюта алмашув курсини қиймати 7800 сўмдан паст даражада бўлишини кутаётган аҳолининг улуши 52 фоизга ва тадбиркорлик субетларининг улуши 63 фоизга тенг бўлди. Сўровда иштирок этган жисмоний шахсларнинг 19 фоизи ва юридик шахсларнинг 13 фоизи йил охирида алмашув курси 8000 сўмдан юқори бўлишини эътироф этди. Сўровда иштирок этган экспертларнинг 91 фоизи III чорак охирида миллий валюта алмашув курси 8000 сўмдан паст бўлишини қайд этди.
Изоҳ (0)