«Тошшаҳартрансхизмат» таркибига кирувчи 8-автобус саройи ва 2-автобус саройининг айрим автобусларига синов тариқасида видеокузатув мосламалари ўрнатилди. Бу ҳақда, «Тошшаҳартрансхизмат»нинг Ҳаракат хавфсизлиги бўлими бошлиғи Улуғбек Тўрабековга асосланиб, UzNews хабар берди.
Ҳозирги вақтда икки йўналишдаги автобусларга икки хил турдаги видеокузатув мосламалари 15—30 кунлик синов учун ўрнатилган бўлиб, синов якунларига кўра улардан бир тури қолган барча автобусларга ўрнатиш учун танлаб олинади.
Автобуснинг олд, ён ва орқа томонларидаги барча воқеа-ҳодисани тўлиқ ёзиб борувчи камералардан ташқари автобусларнинг кириш жойларига йўловчилар сонини ҳисоблаб борувчи камералар ҳам ўрнатилган. «Тошшаҳартрансхизмат» бу камера ёрдамида йўловчилар сонини, қайси йўналишларда автобуслар сонини кўпайтириш кераклигини аниқлашни мақсад қилган.
Бундан ташқари, ҳайдовчиларнинг фаолиятини, уларнинг хатти-ҳаракатларини кузатиб бориш учун ҳам алоҳида видеокузатув мосламалари ўрнатилмоқда. «Агар бу синов ижобий натижа берадиган бўлса, яқин вақт оралиғида барча жамоат транспортида камералар ўрнатилади», дейилади UzNews хабарида.
Изоҳ (0)