Urgut tumani ichki ishlar bo‘limi negizida Ichki ishlar organlari faoliyatini muvofiqlashtirish boshqarmasi tashkil etilgan bo‘lib, o‘tgan vaqt mobaynida bu o‘zgarish o‘z samarasi berdi. Tuman ichki ishlar organlari xalqqa yanada yaqinlashib, ko‘plab jinoyatlar sezilarli ravishda kamaydi. Tuman Ichki ishlar organlari faoliyatini muvofiqlashtirish boshqarmasi xodimlari yanada samarali faoliyat ko‘rsatish maqsadida boshqarmaning hamma qulayliklarga ega yangi binosi qurib foydalanishga topshirildi, deb xabar bermoqda “Daryo” muxbiri Farhod Norbo‘tayev.
Yangi binoning ochilish marosimida O‘zbekiston Respublikasi Ichki ishlar vaziri, generel-mayor P.Bobojonov, Samarqand viloyati IIB boshlig‘i, polkovnik A.Toshpo‘latov, tuman mas’ul rahbarlari, keng jamoatchilik vakillari, faxriylar, fuqarolar ishtirok etdi.
“Urgut tumani viloyatida o‘z salohiyatiga ega, aholisi nisbatan ko‘p bo‘lgan tumanlardan biridir. Mazkur boshqarmada qo‘riqlash, migratsiya va fuqarolikni rasmiylashtirish, yo‘l harakati xavfsizligi xizmatlari uchun alohida binolar mavjud. Shuningdek, kazarma, vaqtincha saqlash hibsxonasi, kinologiya xizmati xizmat itlarini saqlash joylari ham zamonaviy asosoda bunyod etilgan. Qishki va yozgi sport maydonchalari, oshxona xodimlar ixtiyorida. 150 nafardan ortiq shaxsiy tarkibning samarali faoliyat ko‘rsatishi uchun boshqarmada barcha sharoitlar muhayyo qilingan”, – dedi vazir marosimda so‘zga chiqib.
Ta’kidlash lozimki, Urgut tumani viloyatning sanoatlashgan hududlaridan biridir. O‘zbekiston Respublikasi Prezidentining 2017-yil 12-yanvardagi qaroriga ko‘ra mazkur hududda “Urgut” erkin iqtisodiy zonasi tashkil etilgan bo‘lib, 2017—2018-yillarda bu yerda 281, 1 million dollarlik 80 ta loyihani amalga oshirish ko‘zda tutilgan. Agar bu loyihalar amalga oshib, korxonalar to‘la quvvat bilan ishlay boshlasa 5 mingdan ortiq ish o‘rni yaratiladi.
Izoh (0)