НАТОга аъзо мамлакатлар март ойида бўлиб ўтган Афғонистон бўйича Тошкент конференцияси якунларини қўллаб-қувватлади. Бу ҳақда «Дунё» ахборот агентлиги хабар берди.
Шимолий Атлантика альянсининг навбатдаги саммити 11—12 июль кунлари Брюссель шаҳрида бўлиб ўтди, унда тузилмага аъзо 29 та мамлакатнинг давлат ва ҳукумат раҳбарлари иштирок этди.
Саммит қатнашчилари НАТОнинг Афғонистондаги «Қатъий кўмак» миссияси бўйича қўшма баёнот қабул қилди. Ҳужжатда жорий йилнинг 28 февраль куни ўтказилган Афғонистонда тинчлик ва хавфсизлик соҳасида ҳамкорлик йўлидаги «Кобул жараёни» анжумани эътироф этилди.
Шунингдек, Ўзбекистон Президенти Шавкат Мирзиёевнинг ташаббуси билан 2018 йил 26—27 март кунлари бўлиб ўтган «Тинчлик жараёни, хавфсизлик соҳасида ҳамкорлик ва минтақавий шериклик» мавзуида Афғонистон бўйича Тошкент халқаро конференциясининг натижалари алоҳида миннатдорлик билан қайд этилди.
Бирлашган Миллатлар Ташкилоти Бош Ассамблеясининг 2018 йил 22 июнь куни қабул қилинган Марказий Осиё бўйича резолюциясида ҳам Тошкент конференциясининг афғон можаросини узил-кесил ҳал қилишда муҳимлиги алоҳида кўрсатилган эди.
Изоҳ (0)