Бугун, 12 июль санасида футбол бўйича Ўзбекистон Pepsi Суперлигасида қолдирилган 14-тур учрашувлари бошланди. Кун тақвимидан 3 та ўйин ўрин олганди.
Уларнинг дастлабкиси Жиззахда «Сўғдиёна» ҳамда «Бухоро» жамоалари ўртасида кечди. Ўйин тақдири иккинчи бўлим 6 дақиқасида ҳал этилди. Аввалига 48-дақиқада жиззахликлар легионери Никола Милинкович ҳисобни очган бўлса, орадан 4 дақиқа ўтиб Санжар Рашидов ҳисобни 2:0 кўринишига келтирди. Ўйинга якуний нуқтани 54-дақиқа Шохруз Норхонов қўйди. Шу тариқа «Сўғдиёна» 3 очкога эга бўлди.
Куннинг иккинчи учрашуви Тошкентда «Бунёдкор» ҳамда Фарғонанинг «Нефтчи» клублари ўртасида бўлиб ўтди. Беллашувда ҳисоб 42-дақиқада «Нефтчи» томонидан очилди. Фарғоналиклар ҳужумчиси Шерзод Ҳакимов қанотдан узатилган тўпга акробатик тарзда зарба бериб, Мурод Зухуровни ожиз қолдирди.
Иккинчи бўлимнинг 66 ва 69-дақиқасида Жавлон Иброҳимов 2 та гол уриб, жамоасининг ғалабасини таъминлади.
Куннинг сўнгги ўйини ҳозиргина Олмалиқда якунига етди. АГМК ўз майдонида «Пахтакор»ни қабул қилиб, 0:1 ҳисобида имкониятни бой берди. Қайд этиш жоиз, учрашув бош ҳаками Владислав Сейтлин Музаффар Музаффаровга 52-дақиқада иккинчи сариқ карточкани кўрсатиб майдондан четлатди. Деярли бир бўлим бир киши кам бўлиб ўйнаган АГМК учрашувнинг 85-дақиқасига келиб ўз дарвозасидан тўп олиб чиқди. Гол муаллифи захирадан майдонга тушган Жасур Яхшибоев бўлди.
Шу тариқа «Пахтакор» навбатдаги 3 очкони қўлга киритди.
Pepsi Суперлига
14-тур беллашувлари
12 июль, пайшанба
«Сўғдиёна» — «Бухоро» 3:0
Голлар: 1:0—48 Никола Милинкович, 2:0—54 Санжар Рашидов, 3:0—56 Шохруз Норхонов.«Бунёдкор» — «Нефтчи» 2:1
Голлар: 0:1—42 Шерзод Ҳакимов, 1:1—66 Жавлон Иброҳимов, 2:1—69 Жавлон Иброҳимов.АГМК — «Пахтакор» 0:1
Гол: 0:1—85 Жасур Яхшибоев.Четлатиш: Музаффар Музаффаров (52).
Изоҳ (0)