11 июль санасида футбол бўйича Россия яшил майдонларида бўлиб ўтаётган Жаҳон Чемпионати ярим финалининг иккинчи жуфтлик учрашуви бўлиб ўтди.
Унда чорак финалда Россия ҳамда Швецияни қолиб кетишга мажбур қилган Хорватия ҳамда Англия терма жамоалари ўзаро беллашди.
Мазкур ўйин ғолиби ЖЧ—2018 ғолиблиги учун финал баҳсида Францияга қарши курашиш имкониятини қўлга киритарди.
Учрашувда ҳисоб 5-дақиқада очилди. Киран Триппьер жарима зарбасини қойилмақом тарзда амалга ошириб, Англияни олдинга олиб чиқди. Биринчи бўлим 1:0 ҳисобида якунланди.
Иккинчи бўлимнинг 68-дақиқасида Иван Перишич гол уриб, ҳисобни тенглаштирди. Иккинчи тайм эса 1:1 ҳисобида якунига етди.
Қўшимча бўлимларнинг иккинчисида Марио Манжукич гол киритиб, Хорватиянинг финалга чиқишини таъминлади.
Шу тариқа Хорватия 15 июль санасида финал ўйинида Францияга қарши кураш олиб борадиган бўлди. Бу Хорватия учун биринчи Жаҳон Чемпионати финалидир.
Англия эса 3-ўрин учун «эски қадрдон»и Бельгия билан баҳсга киришади. Жамоалар гуруҳ босқичида ҳам бир-бирига дуч келган эди. 3-ўрин учун баҳс 14 июль куни бўлиб ўтади.
Жаҳон Чемпионати
½ финал беллашуви
11 июль, чоршанба
Хорватия — Англия 2:1
Голлар: 0:1— 5 Триппьер, 1:1 68 Перишич, 2:1—109 Манжукич.Хорватия: Субашич, Ловрен, Стринич (Пиварич, 95), Врсалько, Видa, Ракитич, Брозович, Перишич, Модрич (Бадел, 119), Ребич (Крамарич, 101), Манжукич (Чорлука, 115).
Англия: Пикфорд, Уокер (Варди, 112), Стоунз, Янг (Роуз, 90), Магуайр, Алли, Лингард, Стерлинг (Рэшфорд, 74), Ҳендерсон (Даер, 97), Триппьер, Кейн.
Огоҳлантиришлар: Манжукич (48), Уокер (54), Ребич (96).
Изоҳ (0)