Хитойлик ҳамкорлар билан ИИВ академиясида Симуляция ва моделлаштириш маркази қурилиши бўйича келишувлар давом этмоқда. Бу ҳақда Ички ишлар вазири Пўлат Бобожонов бошчилигидаги делегациянинг мазкур давлатга сафари давомида маълум бўлди, дея хабар беради ИИВ жамоатчилик ва ОАВ билан алоқалар бошқармаси.
Мазкур лойиҳа учун Хитой томонидан 22 миллион доллар ажратилиши кўзда тутилган. Ушбу марказ ишга тушиб, Пекин полиция университетидаги каби замонавий технологиялар билан жиҳозланса, у соҳа учун етук кадрлар етиштириб чиқадиган Марказий Осиёда ягона даргоҳ бўлади.
Шунингдек, делегация аъзоларини Хитой жамоат хавфсизлиги биринчи илмий-тадқиқот институтида яратилган ихтиролар, хусусан, турли қўпорувчилик ҳаракатларида, портловчи ускуналарни зарарсизлантиришда, жиноятчилардан ҳимояланишда ва яна кўплаб ҳар хил вазиятларда фойдаланишда асқатадиган кийимлар, ҳимоя воситалари катта қизиқиш уйқотди. Айниқса, жамоат жойлари, метро ва одамлар қатнови кўп бўладиган масканларга ўрнатиладиган сканерлаш ускунаси кўпчиликнинг эътиборини торди.
Унинг афзаллиги шундаки, ҳаракатланаётган кўплаб одамларни тез ва сифатли сканердан ўтказиб, улар орасидан танасида турли портловчи мослама ёки қуролни яшириб ўтказишга уринган ёвуз ниятли кимсани тезда аниқлайди. Бундан ташқари, давлат идоралари, ташкилотлар, муассасалар кириш жойига ўрнатиладиган мослама ҳам эътибордан четда қолмади. У орқали бинога кираётган шахснинг илгари жиноят содир этган-этмагани, қидирувдалиги тезда аниқланади.
Меҳмонхоналар, муҳим қўриқланадиган объектларга киришда машиналарнинг таг қисмини ҳеч бир шахс аралашувисиз, мустақил текширадиган, хавф бўлса автоматик равишда хабар берадиган мослама ҳам Ўзбекистон вакилларида катта таассурот қолдирди.
Изоҳ (0)