Мактаб ўқувчилари кетаётган автобус Ҳиндистон шимолидаги Уттар-Прадеш штатида дарага қулаб кетди. Бу ҳақда ANI агентлигига таяниб, «РИА Новости» хабар берди.
Маълумотларга қараганда, ҳалокат 2 июль, душанба куни Чартхавал округида юз берган. Дастлабки хабарларга қараганда, камида 6 нафар ўқувчи турли даражадаги тан жароҳати олган. Айни вақтга қадар жабрланганлар шифохонага олиб келинган, уларнинг ҳаёти хавф остида эмаслиги хабар қилинган.
Воқеа сабаблари борасида ҳозирча ҳеч қандай ахборот тақдим қилинмаган.
Аввалроқ, 1 июль, якшанба куни Ҳиндистоннинг Уттаракханд штатида сўнгги йиллардаги энг йирик авария юз берган. 50 та йўловчиси бўлган автобус 200 метр чуқурликка қулаб кетган. Сўнгги маълумотларга қараганда, 45 киши воқеа жойида ҳалок бўлган, орадан вақт ўтгач яна 2 киши олган жароҳати туфайли вафот этган.
Эслатиб ўтамиз, Ҳиндистоннинг Уттар-Прадеш штатида юз берган автобус иштирокидаги йўл-транспорт ҳодисаси оқибатида камида 17 киши ҳалок бўлди, 12 киши жароҳатлангани ҳақида маълумот берилган эди.
Изоҳ (0)