Ўзбекистонда бўлиб турган «Озодлик» радиоси вице-президенти, бош муҳаррир Ненад Пежич Ички ишлар вазирлигида қабул қилинди ҳамда жамоатчилик ва ОАВ билан алоқалар бошқармаси бошлиғи генерал-майор Қутбидин Бурхонов билан учрашди.
Учрашув давомида мамлакатда олиб борилаётган инсонпарварлик сиёсати, хусусан, жиноятга қўл урган инсонларни соғлом ҳаётга қайтариш, жамиятда ўз ўрнини тиклаб олиши учун яратилаётган шарт-шароитлар ҳақида сўз борди. Хусусан, давлат раҳбари томонидан 2017 йилнинг декабрь ойида 2700 нафар ва жорий йил июнь ойида 226 нафар озодликдан маҳрум этилган фуқарога афв берилгани алоҳида таъкидлаб ўтилди.
«Озодлик» радиоси бош муҳаррири вазирлик раҳбариятига ўзини қизиқтирган саволларга тўлиқ жавоб олгани учун миннатдорлик билдирди. Мамлакатга Ўзбекистонда амалга оширилаётган ижобий ўзгаришларни ўз кўзи билан кўриб, қатор масалаларни ҳамкорликда ҳал этиш учун келганини қайд этиб ўтди.
Изоҳ (0)