Олий Мажлис Сенатининг ўн бешинчи ялпи мажлисида нутқ сўзлаган Ўзбекистон бош прокурори Отабек Муродов собиқ бош прокурор Рашиджон Қодировга нисбатан очилган жиноят иши ҳақида гапирди, деб хабар беради «Газета.uz».
Отабек Муродовнинг айтишича, Рашиджон Қодиров иши доирасида қамоққа олинганлар ҳам, гаров эвазига озод қилинганлар ҳам бор. Бош прокурор айбланувчиларни озодликдан маҳрум этиш асосий мақсад ҳисобланмаслигини маълум қилди (Бош прокуратурада 5 июнь куни ўтказилган брифингда жами 24 кишига нисбатан айблов эълон қилингани, 21 киши қамоққа олингани ҳақида ахборот берилганди).
«Бизнинг мақсадимиз — уларни қамаш эмас. Биз буни аҳолига етказишимиз керак. Бу давлат раҳбари Шавкат Мирзиёевнинг сиёсати. Тўрт нафар бошқа масъул шахслар кўрилган зарани қоплади. Олганини қайтарди. Шунинг учун биз уларни гаров эвазига ҳибсдан озод этдик. Улар юқори лавозимларда фаолият юритадиган шахслар», — дейди Отабек Муродов.
Бош прокурор тергов сирини ҳисобга олган ҳолда ишга алоқадор ҳамма маълумотларни ошкор қилиб бўлмаслигини, бироқ тергов тугаши билан аҳоли содир этилган жиноятлардан хабардор қилинишини айтиб ўтган.
«Албатта вақти келиб тергов тугайди, биз ишга оид маълумотларни максимал тарзда ошкор этамиз: Қанча пул ўғирланган, улар нима ишлар қилган, қанақа поралар олган — талон тарож қилинган маблағ миқдори жуда катта», — дейди Отабек Муродов.
Рашиджон Қодиров 2000—2015 йилларда Ўзбекистон бош прокурори бўлган, 2015—2017 йилларда эса у конституциявий суд судьяси этиб тайинланган.
Ўзбекистон Республикаси бош прокуратураси шу йилнинг февраль ойида Рашиджон Қодировга нисбатан жиноят иши қўзғатилганини маълум қилган эди.
Изоҳ (0)