Ўзбекистон Президенти ташаббуси билан 26—30 июнь кунлари Тошкент ва Самарқанд шаҳарларида илк бор Марказий Осиё ёшлар форуми ўтказилади. Бу ҳақда «Дарё»га Ёшлар медиа маркази маълум қилди.
Қардош халқлар ёшларини бирлаштирувчи мазкур форумдан мақсад Марказий Осиё мамлакатлари ёшлари билан ҳамкорликда ижтимоий аҳамиятли лойиҳалар ва дастурларни амалга оширишдир.
Тадбирда Ўзбекистон делегация аъзолари, жумладан, Ўзбекистон Ёшлар иттифоқи, Қозоғистоннинг «Жас отан» ёшлар қаноти ва «Нур отан» партияси, Қирғизистоннинг ёшлар, жисмоний тарбия ва спорт агентлиги, Тожикистоннинг Ёшлар ва спорт қўмитаси, Туркманистоннинг спорт ва ёшлар сиёсати вазирлиги ҳамда Maxтумқули номидаги Туркманистон ёшлар ташкилоти кенгаши вакиллари ўз тажрибаларини ўртоқлашади, Ўзбекистонда рўй бераётган ўзгаришларга гувоҳ бўлади.
Форум доирасида ёшларга оид кўплаб мавзуларда анжуманлар ташкил этилади. Жумладан, «Фан ва таълимни ривожлантиришда ёшларнинг ўрни», «Марказий Осиё минтақасидаги маданий ҳамкорлик», «Ёшлар туризми Марказий Осиё тараққиётининг асосий омили ҳисобланади», «Терроризмга олиб келувчи тажовузкор экстремизм ва радикализмнинг олдини олиш ҳамда уларга қарши курашишда ёшларнинг роли» каби мавзуларда Марказий Осиёнинг фаол ёшлари давра суҳбатлари ўтказилади.
Марказий Осиё ёшлар форуми якунида мамлакатлар ўртасида «Қўшма ҳамкорлик 2019—2021» меморандумини имзолаш режалаштирилмоқда. Форум минтақа ёшлари учун мулоқот майдони ва мамлакатлараро муносабатларни ривожлантириш платформасига айланиши кутилмоқда.
Изоҳ (0)