Россия Халқаро космик станцияда ўтказилаётган тажрибалари сонини камайтириши мумкин. Бу «Прогресс» юк кемасига эҳтиёжни пасайтириш билан боғлиқ, деб ҳисоблайди Россия Космик сиёсат институтининг илмий раҳбари Иван Моисеев. Бу ҳақда «РИА Новости» хабар қилди.
Аввалроқ «Роскосмос»нинг янги бош директори Дмитрий Рогозин Россия ХКСда эскирган тажрибаларни ўтказишдан воз кечишини маълум қилган. Қолган тажрибаларнинг асосий қисми эса станциянинг Россия сегменти автономлигини кенгайтиришга йўналтирилади.
Моисеевнинг сўзларига кўра, бу фақат тежамкорлик билан боғланган, бошқа янги тажрибалар йўқ. ХКСда тажрибаларнинг ташкил қилиниши иккита муаммо билан боғланган эди. Биринчидан, станция ишининг дастлабки йилларида тажрибалар етишмаган.
Иккинчи муаммо маблағларнинг етишмаслиги. Экспертнинг фикрига кўра, Россия экипажининг қисқариши «Прогресс» юк кемаси парвозларини ҳам камайтириши мумкин. Айнан станцияга камроқ юк олиб чиқиш учун тажрибалар сонини камайтириш режалаштирилмоқда.
Изоҳ (0)