Инновацион ривожланиш ҳамда Олий ва ўрта махсус таълим вазирликларининг таклифига асосан Фарғона давлат университетида Балиқчилик илмий-инновацион марказини очиш бўйича амалий ишлар бошланди. Бу ҳақда «Дарё»га Инновация вазирлиги матбуот хизмати маълум қилди.
Марказда экспериментал-селекцион тадқиқотлар ўтказиш, янги балиқларини мослаштириш ва урчитиш, юқори оқсилли ем-озуқа базасини шакллантириш бўйича экспериментал тадқиқот олиб бориш, илмий лабораторияда балиқ турларини етиштириш, интенсивлаштириш бўйича генетик тажрибаларни амалга ошириш, балиқ маҳсулотларини қайта ишлаш, сақлаш ва истеъмолга тайёрлашнинг технологик циклини тадқиқ этишга ихтисослашган, замонавий лаборатория ускуналари билан жиҳозланган илмий лаборатория ташкил этилиши кўзда тутилган.
Балиқчилик билан 2007 йилдан бери шуғулланиб келаётган Фарғона шаҳридаги «Урағбой ота» фермер хўжалиги раҳбари Алишер Мамажонов бугунги кунда умумий майдони 7 гектарни ташкил этувчи 8 та ҳовузда оқ дўнгпешона, чипори дўнгпешона, оқ амур, карп балиқларини етиштириб, вилоятдаги мактабгача таълим муассасалари, саҳоват уйларини балиқ маҳсулотлари билан таъминлаб келмоқда.
— Ҳозирда 1 гектар ҳавзада йилига ўртача 6–9 тонна балиқ етиштирамиз, — дейди Алишер Мамажонов. — Бу кўрсаткичга етиб келгунимизча анча қийинчиликлардан ўтдик. Иш бошлаганимизда балиқларни нобуд қилиб қўйган пайтларимиз ҳам бўлди. Сабаби бизда соҳага янги кириб келган амалиётчилар учун махсус адабиётлар, йўриқномалар мавжуд эмас. Ҳовузларни қандай кавлаш кераклигидан бошлаб, балиқларни қай йўсинда боқиш керак, уларни озиқлантириш масаласи каби саволларга жавоб берадиган қўлланмалар ишлаб чиқилиши керак. Бундан ташқари, назарий ва амалий билимларга эга кадрларни етиштириш ҳам муҳим масалалардан. Бу йўлда ўз тажрибаларимдан келиб чиқиб, «Ўзбекистон Республикаси минтақаларида ҳовуз балиқчилигини юритиш асослари» китобини ёзиб тугатдим. Нашрдан чиққач, ундан ўқув қўлланмаси сифатида фойдаланиш мумкин бўлади.
Айнан балиқчилик билан шуғулланаётганлар ёки шу ишни бошлашни режалаштирган тадбиркорлар учун янги очилаётган Балиқчилик илмий-инновацион маркази ривожланган хорижий мамлакатлар тажрибаларини ўрганиш асосида интенсив усулларда балиқ етиштириш, балиқ касалликларини ўрганиш ва уларнинг олдини олиш ҳамда даволаш бўйича илмий асосланган тавсиялар ишлаб чиқаради.
Бундан ташқари, сув ҳавзаларида балиқ етиштириш маҳсулдорлигини ошириш бўйича тавсиялар бериб боради, ҳудудда мавжуд балиқ етиштирувчи корхона ва хўжаликларни илмий экспертизадан ўтказиш ва сув ҳавзаларини паспортлаштириш ҳам марказнинг зиммасида бўлади.
Шунингдек, марказга қимматбаҳо, экспортбоп балиқ турларини кўпайтириш, юқори оқсилли ем-озуқа базасини шакллантириш бўйича экспериментал тадқиқотлар олиб бориш вазифалари юклатилган.
Изоҳ (0)